वाम गठबन्धनलाई शंका नगर्नुस् – प्रचण्ड

रत्ननगर, चितवन, १६ मंसिर (रासस) – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले मुलुकको विकास र समृद्धिका लागि वाम गठबन्धन गरिएकाले शंका नगर्न आग्रह गर्नुभएको छ ।

नेपाली काँग्रेस लगायत दलले गठबन्धनबारे अनर्गल प्रचार गरेको उल्लेख गर्दै चितवन क्षेत्र नं ३ बाट प्रतिनिधिसभा सदस्यका उम्मेदवार रहनुभएका अध्यक्ष दाहालले बलियो गठबन्धन गरेर अघि बढ्न काँग्रेसलाई समेत सुझाव दिनुभयो ।

भरतपुर महानगरपालिका–९ दराई टोलमा आज अपराह्न भएको चुनावीसभालाई सम्बोधन गर्दै उहाँले वाम गठबन्धन एउटै कम्युनिष्ट केन्द्र बनाउने र विकास गर्ने गरी अघि बढेका प्रष्ट पार्नुभयो । दुई वटा शक्तिका बीचमा प्रतिष्पर्धा हुनु देशका लागि फाइदाजनक हुने अध्यक्ष दाहालको भनाइ थियो ।

अहिलेको वाम एकता देशको विकास, स्थायित्व र राष्ट्रको समृद्धिका लागि भएको भन्दै उहाँले त्यसमा सबैको साथ पाउने आशा व्यक्त गर्नुभयो ।

अहिलेको अवस्थामा मतदाता सचेत भैसकेको र किनवेचको राजनीतिमा कोही पनि नफस्ने जिकिर गर्दै अध्यक्ष दाहालले कम्युनिष्ट सरकारकै पालामा वृद्धभत्ताको शुरुआत गरिएजस्तै अन्य कल्याणकारी काममा पनि वाम गठबन्धन लागिपर्ने प्रतिबद्धता जनाउनुभयो ।

सो क्रममा राप्रपा प्रजातान्त्रिक तथा नेपाली काँग्रेसलगायत विभिन्न दल परित्याग गरी आएका करिब २०० जनालाई उहाँले पार्टीमा प्रवेश गराउनुभएको थियो । आजै उहाँले भरतपुरमा वाम गठबन्धनको दलित प्रतिनिधिको छलफल कार्यक्रममा सहभागी हुँदै हरेक क्षेत्रबाट गठबन्धनका उम्मेदवारलाई जिताउन लाग्नुपर्नेमा जोड दिनुभएको थियो ।