मधेशी जनताको अधिकार रक्षा कांग्रेसले गर्छ- प्रधानमन्त्री

सर्लाही, १४ मंसिर – प्रधानमन्त्री एंव नेपाली काँग्रेसका सभापति शेरबहादुर देउवाले मधेशी जनतालाई अधिकार सम्पन्न बनाउनका लागि काँग्रेसलाई जिताउन आग्रह गर्नुभएको छ ।

काँग्रेस सर्लाहीद्वारा आज सदरमुकाम मलंगवामा आयोजित आमसभामा उहाँले काँग्रेसको बहुमत आए संविधान संशोधन गरेर मधेशी जनतालाई थप अधिकार सम्पन्न बनाउने प्रतिबद्धता व्यक्त गर्नुभयो ।

प्रधानमन्त्री देउवाले २००७ सालदेखिको मुलुकमा भएको हरेक परिवर्तन काँग्रेसकै नेतृत्वमा भएका बताउँदै लोकतान्त्रिक गणतन्त्रात्मक शासन व्यवस्था संस्थागत गर्न र मुलुकको समृद्धिका लागि काँग्रेसलाई जिताउन आग्रह गर्नुभयो ।

‘सम्पूर्ण मधेशी जनताको अधिकार सुनिश्चितताका लागि नेपाली काँग्रेसलाई जिताउनुको विकल्प छैन्’, उहाँले भन्नुभयो- ‘नेपाल सबै जातजाती र भाषाभाषीको साझा मुलुक हो, त्यसैले सबै नेपालीको हकअधिकार, स्वाभिमान र सम्मानको रक्षा नेपाली काँग्रेसले मात्र गर्न सक्छ ।’

प्रधानमन्त्री देउवाले पहाडी–मधेशी वा अरु कुनै बहानामा मुलुक विखण्डन गर्न खोज्नेलाई हैन, सबै जातजाति र भाषाभाषीको नेपाल बनाउने काँग्रेसलाई रोज्न आग्रह गर्नुभयो ।

एमाले सधैं मधेश र मधेशी जनताको विरोधी पार्टी रहेकाले काँग्रेसका उम्मेदवारलाई विजय गराउन पनि उहाँले सबैलाई आग्रह गर्नुभयो ।

लोकतन्त्र रक्षाका लागि लोकतान्त्रिक गठबन्धनलाई जिताउन जरुरी

हेटौँडा, १४ मंसिर – प्रधानमन्त्री देउवाले लोकतान्त्रिक गठबन्धनले जितेमा विकासनिर्माणसँगै धार्मिक सांस्कृतिक क्षेत्रको विकासमा उल्लेख्य काम गरेर देखाउने बताउनुभएको छ ।

मकवानपुरको थाहा नगरपालिकामा आज भएको चुनावीसभालाई सम्बोधन गर्दै प्रधानमन्त्री देउवाले लोकतान्त्रिक गठबन्धनको जित लोकतन्त्र रक्षाको लागि भएकाले पनि सुनिश्चित गर्न मतदातालाई आग्रह गर्नुभयो ।

उहाँले भन्नुभयो, ‘वाम गठबन्धनबाट लोकतन्त्रको रक्षा नहुने भएकाले पनि तपाईँहरुले लोकतन्त्र रक्षाको लागि लोकतान्त्रिक गठबन्धनलाई जिताउनैपर्ने भएको छ ।’

कार्यक्रममा उपप्रधानमन्त्री एवं प्रतिनिधिसभा क्षेत्र नं १ का उम्मेदवार कमल थापाले अन्य दलले वर्षौंदेखि जितेर पनि जनताको सुःख दुःखमा साथ नदिएको भन्दै यस पटक मतदाताले लोकतान्त्रिक गठबन्धनलाई रोज्ने बताउनुभयो ।

उहाँले आफूले अवसर पाउँदा मकवानपुरमा विकासका धेरै काम गरेको भन्दै पुनःसहयोगका लागि आग्रह गर्नुभयो । उहाँले अब लोकतान्त्रिक गठबन्धनबाट जितेर गएका जनप्रतिनिधिसँग मिलेर उल्लेख्य काम प्रतिबद्धता व्यक्त गर्नुभयो ।

कार्यक्रममा काँग्रेसका नेता बालकृष्ण खाँणले मकवानपुरले इन्द्रबहादुर बानियाँलाई जिताए काँग्रेस प्रदेशको मुख्यमन्त्री बनाउन पहल गर्ने बताउँदै मतदातासँग मत माग्नुभयो ।

उद्योगपति विनोद चौधरीले लोकतान्त्रिक गठबन्धनले विकासनिर्माणमा मुख्य भूमिका खेल्ने भएकाले आफू सो पार्टीमा प्रवेश गरेको बताउनुभयो । काँग्रेस मकवानपुरका निवर्तमान सभापति रघुरमण न्यौपानेको अध्यक्षतामा सम्पन्न कार्यक्रममा लोकतान्त्रिक गठबन्धनबाट मकवानपुर प्रतिनिधिसभा क्षेत्र नं २ का उम्मेदवार महालक्ष्मी उपाध्याय (डिना), प्रदेशसभा क्षेत्र नं २ (क) का उम्मेदवार यतिराज सापकोटा, (ख) का उम्मेदवार बानियाँलगायतले मन्तव्य दिनुभएको थियो ।