बुधबार, कार्तिक १२ २०७७ | Wed, October 28, 2020
नेपालको समय: १९:३५ | UK Time: 13:50

हिंसात्मक घटनाका दोषीमाथि कारबाही गर्न सरकारसँग आग्रह

रासस
२०७४ मंसिर १३ गते २३:२८

सप्तरीमा प्रेसरकुकर बम बिष्फोट गराउने तथा हतियारसहित पक्राउ परेका तिन जना अभियुक्तलाई जिल्ला प्रहरी कार्यालय राजविराजमा बुधबार आयोजित पत्रकार सम्मेलनमा सार्वजनिक गर्दै । तस्वीर – अरुण कुमार यादव, राजविराज, रासस

काठमाडौँ, १३ मंसिर – राष्ट्रिय मानवअधिकार आयोगले प्रतिनिधिसभा र प्रदेशसभाको दोस्रो चरणको निर्वाचनका क्रममा भइरहेका हिंसात्मक घटनामा संलग्न दोषीलाई कारबाही गर्न सरकारसँग आग्रह गरेको छ ।

आयोगका निमित्त सचिव यज्ञप्रसाद अधिकारीले आज एक प्रेस विज्ञप्ति जारी गरी निर्वाचनका क्रममा भएका घटनाको अनुसन्धान गरी दोषीलाई कारबाही गर्न र भयरहित वातावरणको सिर्जना गरी निर्वाचन सम्पन्न गर्न सरकारसँग आग्रह गरेको छ ।

आयोगले निर्वाचनको प्रचारप्रसार, आमसभा गर्दा अन्य व्यक्तिको मानवअधिकारको सम्मान गर्न, संयमित र शान्तिपूर्णरूपमा निर्वाचन आचारसंहिताको पालना गरी निर्वाचन प्रक्रिया अगाडि बढाउन सरकारका साथै सबै राजनीतिक दलसँग आग्रह गरेको छ ।

यही मंसिर १२ गते दाङको तुलसीपुरमा राजनीतिक दलको आमसभास्थल नजिकै बम विस्फोट हुँदा सात जना सुरक्षाकर्मी घाइते भएको र म्यादी प्रहरी विनोद चौधरीको उपचारका क्रममा मुत्यु भएको घटनाप्रति दुःख व्यक्त गर्दै आयोगले मृतकका शोक सन्तप्त परिवारजनप्रति समवेदना प्रकट गरेको छ ।

ललितपुरको लगनखेलमा आमसभा नजिकै विस्फोट भएको, उदयपुरमा एम्बुसमा परी उम्मेदवारसहित गम्भीर घाइते भई त्रिवि शिक्षण अस्पतालमा उपचारसमेत भइरहेको, मोरङ, झापा, बारा, महोत्तरी, सप्तरी, ललितपुर, भक्तपुर, नवलपरासी र गुल्मीलगायतका जिल्लामा उम्मेदवारलाई लक्षित गरी बम विस्फोट, झडप भएको पाइएको र उम्मेदवारका घरमा विस्फोट गराइएको पाइएको भन्दै आयोगले ती घटनाको भत्र्सना गरेको छ ।

प्रतिक्रिया

सम्बन्धित सामाग्री

फेसबुक