
विमान दुर्घटनाका गम्भीर घाइतेलाई नेपालगन्ज पठाइयो
सिमिकोट, १२ मंसिर (रासस) – तारा एयरको विमान दुर्घटनामा परी गम्भीर घाइते भएका चार जनालाई थप उपचारका लागि नेपालगन्ज पठाइएको छ ।
दुर्घटनामा परी गम्भीर घाइते भएका विमानका क्याप्टेनद्वय वसन्त लामा र अनुप गुरुङ, विमान परिचारिका श्रेया श्रेष्ठ तथा प्रहरी सहायक निरीक्षक यामप्रसाद दाहाललाई थप उपचारका लागि तार एयरकै अर्को विमानबाट नेपालगन्ज पठाइएको हुम्लाका प्रमुख जिल्ला अधिकारी लक्ष्मीप्रसाद बास्कोटाले जानकारी दिनुभयो । दुर्घटनामा परेका अन्य घाइतेको स्थानीय स्वास्थ्य संस्थामा उपचार भइरहेको छ ।
दुर्घटनाग्रस्त उक्त विमानमा चालक दलका तीनसहित १६ नेपाल प्रहरीका जवान सवार थिए । उनीहरु यही मंसिर १० गते सम्पन्न प्रतिनिधिसभा तथा प्रदेशसभा सदस्य निर्वाचनको सुरक्षाका लागि खटिएर फकर्ने क्रममा दुर्घटनामा परेका हुन् ।
सिमिकोट विमानस्थलबाट सुर्खेतका लागि उडान भर्ने क्रममा आज बिहान ९.४५ बजे तारा एयरको ९एन–एबिएम कलसाइनको ट्वीनअटर विमान दुर्घटनामा परेको थियो ।
धावन मार्ग छाड्ने बेलामा विमानको बायाँपट्टिको टायर पञ्चर भएर नियन्त्रणमा ल्याउन नसक्दा जहाज दुर्घटनामा परेको बताइएको छ । धावनमार्गबाट तल झरेर बिजुलीको खम्बामा ठक्कर खाँदा विमानको अगाडिको भाग नराम्ररी क्षतिग्रस्त भएको छ ।
नागरिक उड्डयन कार्यालयका अधिकृत भीमदत्त पन्तले दुर्घटनाका कारण पत्ता लगाउन केन्द्रबाट प्राविधिक टोली बुधबार सिमिकोट आउने जानकारी दिनुभयो । विमान दुर्घटनामा परेलगत्तै नेपाली सेना, नेपाल प्रहरी र स्थानीयवासी उद्धार कार्य जुटेका थिए ।
प्रतिक्रिया

सम्बन्धित सामाग्री
- नयाँ भाइरस तीव्र गतिमा फैलिएपछि लण्डन, पूर्वी र दक्षिण पूर्वी इंग्ल्याण्ड टियर ४ मा
- बेलायतमा काम गर्न चाहने विदेशी नागरिकका लागि मङ्गलबारदेखि भिसा आवेदन खुला
- बेलायत सरकारद्वारा गोरखा भूपू सैनिकका लागि नयाँ पेन्सनको प्रस्तावमाथि सुझाव माग
- कोरोना खोपको पहिलो डोज लिएका पुडासैनीलाई कोरोना संक्रमण
- ‘बेलायतमा वर्क पर्मिट खुल्यो भनेर हल्लाको पछि नलागी बुझेर मात्र आउनुहोस्’ : सोलिसिटर दिपक भट्टराई