नेपाल र युएईबीचको परामर्श संयन्त्र बैठक नेपालमा छिट्टै

संयुक्त अरब इमिरेट्स (इएई) को चार दिने औपचारिक भ्रमण सकेर बिहीबार स्वदेश फर्कनु भएका राष्ट्रपति विद्यादेवी भण्डारीलाई त्रिभुवन अन्तर्राष्ट्रिय विमानस्थलमा स्वागत गर्नुहुँदै उपराष्ट्रपति नन्दबहादुर पुन । तस्बिर – प्रदीपराज वन्त, रासस

काठमाडौँ, ३० कात्तिक (रासस) – राष्ट्रपति विद्यादेवी भण्डारी संयुक्त अरब इमिरेट्सको चारदिने औपचारिक भ्रमण सकेर आज स्वदेश फर्कनुभएको छ ।

राष्ट्रपति भण्डारी युएईको अबुधाबीका युवराज तथा त्यहाँका सशस्त्र बलका नायब सर्वोच्च कमाण्डर शेख महम्मद बिन जाहेद अल नेह्यानको निमन्त्रणामा सोमबार अपराह्न त्यसतर्फ प्रस्थान गर्नुभएको हो । राष्ट्रपति भण्डारीलाई त्रिभुवन अन्तर्राष्ट्रिय विमानस्थलको अतिविशिष्ट कक्षमा उपराष्ट्रपति नन्दबहादुर पुन, उपप्रधानमन्त्री विजयकुमार गच्छदार तथा विशिष्ट अधिकारीले स्वागत गर्नुभयो । नेपाली सेनाको एक टुकडीले राष्ट्रपतिको सम्मानमा २१ तोपको सलामी दिएको थियो ।

भ्रमणका क्रममा भएको आपसी द्विपक्षीय भेटमा नेपालमा छिट्टै हुने संघीय संसद् र प्रादेशिकसभाको निर्वाचन, भूकम्पपछिको पुनःसंरचना, विकासका प्राथमिकता, नेपालमा महिला सहभागिता, व्यापार लगानी, पर्यटन, कृषि जलस्रोत तथा विकासको आधारशिला निर्माणका विषयमा कुराकानी भएको आपूर्तिमन्त्री जयन्त चन्दले जानकारी दिनुभयो ।

सोही अवसरमा राष्ट्रपति भण्डारीले युएईका युवराज, उपराष्ट्रपति र प्रधानमन्त्रीलाई अनुकूल समयमा नेपाल भ्रमणका लागि निमन्त्रण गर्नुभयो । ‘भ्रमणका महत्वपूर्ण उपलब्धिका रूपमा युएईबाट शीघ्र एक प्रतिनिधिमण्डलले नेपालको भ्रमण गर्ने, नेपाल र युएईबीच सन् २०१० मा द्विपक्षीय परामर्श संयन्त्र स्थापना भएको तर त्यसको बैठक हालसम्म नबसेको हुँदा अब छिट्टै नेपालमा बैठक आयोजना गरी सबै विषयमा परामर्श गर्ने र सहयोग र सम्बन्धलाई अगाडि बढाउने विषयमा दुई पक्षबाट प्रतिबद्धता व्यक्त भएको छ’, मन्त्री चन्दले भन्नुभयो ।

युएईमा कार्यरत करिब दुई लाख नेपालीको हित र कल्याणका लागि निरन्तर पहल गर्नेबारे पनि छलफल भएको छ । नेपाल तथा युएईले सन् १९७७ जनवरी २२ मा कूटनीतिक सम्बन्ध स्थापना गरेका थिए ।

प्रतिक्रिया

सम्बन्धित सामाग्री