शनिबार, कार्तिक ८ २०७७ | Sat, October 24, 2020
नेपालको समय: ०८:३७ | UK Time: 03:52

युरोपेली संघले निर्वाचनमा पर्यवेक्षण गर्ने

वीनेपाली
२०७४ कार्तिक २१ गते ०:२५

प्रधानमन्त्री शेरबहादुर देउवासँग प्रधानमन्त्री कार्यालय सिंहदरबारमा सोमबार नेपालका लागि युरोपियन युनियनको निर्वाचन पर्यवेक्षण टोलीले शिष्टचार भेट गर्दै । तस्बिर – रोशन सापकोटा, रासस

काठमाडौँ, २० कात्तिक (रासस) – प्रधानमन्त्री शेरबहादुर देउवासँग नेपालका लागि युरोपेली संघको मिसनका प्रमुख पर्यवेक्षक जेल्जन जोब्कोले शिष्टाचार भेट गर्नुभएको छ ।

सिंहदरबारमा आज भएको भेटमा उहाँहरुबीच प्रतिनिधि सभा र प्रदेश सभा सदस्य निर्वाचनको बारेमा कुराकानी भएको प्रधानमन्त्रीका परराष्ट्र सल्लाहकार डा दिनेश भट्टराइले जानकारी दिनुभयो ।

सो अवसरमा प्रमुख पर्यवेक्षक जोब्कोले निर्वाचनको तयारी र निर्वाचनमा सबै राजनीतिक दलको सहभागिताका लागि प्रधानमन्त्री देउवाले खेलेको भूमिकाको प्रशंसा गर्नुभएको थियो ।

उहाँले निर्वाचनमा आफूहरुले प्रभावकारी रुपमा पर्यवेक्षण गर्ने र निर्वाचनमा देखेको कुरा सुझावका रुपमा सरकारलाई बुझाउने जानकारी गराउनुभएको परराष्ट्र सल्लाहकार डा भट्टराईले बताउनुभयो ।

भेटमा प्रधानमन्त्री देउवाले आफूहरु सबै दलको सहमतिमा मुलुकमा लोकतान्त्रिक प्रक्रिया संस्थागत गर्न लागेको भन्दै निर्वाचन स्वतन्त्र र निष्पक्ष रुपमा सम्पन्न हुने बताउनुभएको थियो ।

आजै प्रधानमन्त्री देउवासँग नेपालका लागि म्यानमाका राजदूत ल्विन ओले बिदाइ भेट गर्नुभयो । प्रधानमन्त्री तथा मन्त्रिपरिषद्को कार्यालयमा भएको भेटमा उहाँहरुबीच दुई मुलुकको आपसी सम्बन्ध र हितका बारेमा कुरा भएको थियो ।

सो अवसरमा प्रधानमन्त्री देउवाले राजदूत ओलाई सफल कार्यकालका लागि बधाई दिनुभएको थियो । राजदूत ल्विन ओ नेपालका लागि राजदूतका कार्यकाल समाप्त गरी स्वदेश फर्कदै हुनुहुन्छ ।

प्रतिक्रिया

सम्बन्धित सामाग्री

फेसबुक