बेलायतका नेपालीले गरे धुर्मुस सुन्तली फाउण्डेशनलाई सहयोग

लन्डन । रौतहटको चन्द्रपुर नगरपालिका वडा नं ८ स्थित सन्तपुरमा निर्माण भइरहेको एकीकृत नमुना वस्ती निर्माणका लागि यूकेमा रहेको नेपाली भाषा तथा सांस्कृतिक केन्द्र एवं बर्न्टओक नेपाली समाज यूकेको संयुक्त प्रयासमा संकलित २ हजार ३९१ पाउण्ड धुर्मुस सुन्तली फाउण्डेशनलाई हस्तान्तरण गरिएको छ। हालै नेपाली भाषा तथा सांस्कृतिक केन्द्रका प्रतिनिधि राजन फुयाँलले कुन्जना घिमिरे (सुन्तली) लाई काठमाडौंमा सो रकमको चेक हस्तान्तरण गरे । सो अवसरमा चलचित्र निर्देशक दिपेन्द्र के खनाल पनि उपस्थित थिए ।

चेक लिंदै श्रीमती घिमिरेले सबै सहयोगी दाताहरुलाई हार्दिक धन्यवाद दिएकी छन् ।

नेपाली भाषा तथा सांस्कृतिक केन्द्र यूके एवं बर्न्टओक नेपाली समाज यूकेले यसअघि बाढी तथा भूकम्प पीडितहरुलाई पनि सहयोग गरेका थिए ।

‘देशबाहिर बसेर पनि नेपालमा धुर्मुस सुन्तली फाउण्डेशनले गर्न लागेको रचनात्मक काममा सघाउन पाउंदा हामीलाई खुसी लागेको छ । हाम्रो सहयोग सदुपयोग हुने हामीले विश्वास लिएका छौं’, नेपाली भाषा तथा सांस्कृतिक केन्द्रका अध्यक्ष सुमन प्रधानले भने । उनले सहयोग रकम नेपाल पठाउन सहयोग गर्ने निर्देशक दिपेन्द्र के खनाललाई पनि धन्यवाद दिए ।

त्यस्तै बर्न्टओक नेपाली समाज यूकेका अध्यक्ष रमेश गुरुङले नेपाली भाषा तथा सांस्कृतिक केन्द्रसंगको सहकार्यमा नेपालमा पुनित उद्देश्यकालागि सहयोग गर्न पाएकोमा खुसी व्यक्त गरे ।

यसअघि धुर्मुस सुन्तली फाउण्डेशनले भूकम्पप्रभावितहरुका लागि सिन्धुपाल्चोकको गिरानचौर र काभ्रेको पहरी तथा महोत्तरीको बर्दिबासमा मुसहर समुदायका लागि नमुना वस्ती निर्माण गरेको थियो ।

नेपाली भाषा तथा सांस्कृतिक केन्द्रले बर्न्टओकको वाटलिङ कम्युनिटी सेन्टरमा हरेक शनिबार दुई घन्टा नेपाली बालबालिकाहरुकालागि नेपाली भाषा कक्षा, योग तथा सांस्कृतिक प्रशिक्षण सञ्चालन गर्दै आएको छ ।