बुधबार, कार्तिक १२ २०७७ | Wed, October 28, 2020
नेपालको समय: २३:१९ | UK Time: 17:34

निर्वाचन कुनै पनि हालतमा रोकिन्न-प्रमुख निर्वाचन आयुक्त

वीनेपाली
२०७४ कार्तिक ८ गते १९:२१

प्रमुख निर्वाचन आयुक्त डा अयोधीप्रसाद यादव

राजविराज, ८ कात्तिक (रासस) – प्रमुख निर्वाचन आयुक्त डा अयोधीप्रसाद यादवले आगामी मंसिर १० र २१ गते हुने प्रतिनिधि सभा र प्रदेश सभाको निर्वाचन अब कुनै पनि हालतमा नरोकिने बताउनुभएको छ ।

निर्वाचन तयारीका क्रममा सप्तरी आउनुभएका डा यादवले आज राजविराजमा आयोजित अन्तक्र्रिया कार्यक्रममा बोल्दै चुनाव रोकिने कार्य अब महाअपराध हुने जिकिरसमेत गर्नुभयो ।

उहाँले निर्वाचनमा आचारसंहिता उल्लंघन गर्ने जोसुकैलाई कारबाही गर्ने प्रतिबद्धता व्यक्त गर्दै आचारसंहिता पालनामा राजनीतिक दलका नेतालाई गम्भीर हुन आग्रहसमेत गर्नुभयो ।

उहाँले चुनावका बेला पार्टीको झण्डा, चुनाव चिह्न अंकित टिसर्ट, टोपी, गम्छालगायत अन्य सामग्री राजनीतिक दलले बाँड्नसक्ने तर सोही सामग्री गरिब, दुःखी एवं बाढीपीडितलाई ती दलले दिन नसक्ने कार्यप्रति दुःख समेत व्यक्त गर्नुभयो ।

प्रमुख निर्वाचन आयुक्त डा यादवले निर्वाचनका समयमा कुनै स्थानीय नेताहरुले त्यस्ता सामग्री प्रयोग गरेको भेटिए त्यसको स्पष्टीकरण पार्टीको केन्द्रीय कार्यालयलाई सोधिने बताउनुभयो ।

सरकारी विद्यालयका शिक्षक र सरकारी क्याम्पसका प्राध्यापक उम्मेदवारको प्रचारप्रसारमा प्रत्यक्ष सहभागी भएको पाइए थुनेर कारबाही गर्न उहाँले स्थानीय प्रशासनलाई निर्देशनसमेत दिनुभयो ।

उहाँले दुवै निर्वाचनका लागि एउटै मतपत्र छापिने बताउँदै स्थानीय निर्वाचनमा २ नं प्रदेशका जनताले जसरी उत्साहपूर्वक सहभगिता जनाए झैँ आउँदो निर्वाचनमा पनि सहभागिता जनाउन जनतासमक्ष आग्रह गर्नुभयो ।

सो कार्यक्रममा जिल्लाका मुख्य निर्वाचन अधिकृत हरिशचन्द्र ढुंगानासहित चारवटै क्षेत्रका निर्वाचन अधिकृत, प्रमुख जिल्ला अधिकारी भागिरथ पाण्डेय, जिल्लास्थित सुरक्षा निकायका प्रमुख, राजनीतिक दलका अध्यक्ष एवं प्रतिनिधि तथा सञ्चारकर्मीको उपस्थिति रहेको थियो ।

प्रतिक्रिया

सम्बन्धित सामाग्री

फेसबुक