शुक्रबार, कार्तिक ७ २०७७ | Fri, October 23, 2020
नेपालको समय: ०८:२२ | UK Time: 03:37

एनआरएन कोषाध्यक्षमा थापा र युवा संयोजकमा शाहको उम्मेदवारी

वीनेपाली
२०७४ असोज २५ गते १०:५३

हिक्मत थापा

काठमाडौँ, २५ असोज (रासस) – गैरआवासीय नेपाली सङ्घ (एनआरएन) को कोषाध्यक्षमा हिक्मत थापा र युवा संयोजकमा स्वतन्त्रप्रताप शाहले उम्मेदवारीको घोषणा गर्नुभएको छ ।

वर्तमान कार्यसमितिको कोषाध्यक्ष रहनुभएका थापाले सोही पदमा पुनः निरन्तरता दिने गरी उम्मेदवारी घोषणा गर्नुभएको हो । आफ्नो कार्यकालमा शुरु भएको भूकम्पपीडितका लागि गोरखाको लाप्राकमा नमूना आवासगृह निर्माण र काठमाडौँमा एनआरएनको केन्द्रीय कार्यालय निर्माणको काम जारी रहेकाले त्यसलाई सम्पन्न गर्न पुनः सोही पदमा उम्मेदवारी दिएको उहाँको भनाइ छ ।

संस्था आर्थिक रुपमा बलियो नहुँदा धेरै साथी अभियानमा सहभागी हुन नसकेकाले एनआरएनलाई आर्थिक रुपमा सबल बनाउनुपर्ने उहाँको चुनाबी नारा छ ।

यसैगरी एनआरएन युवा संयोजकका लागि शाहले उम्मेदवारी घोषणा गर्नुभएको छ । एनआरएन अस्ट्रेलियाको तीन कार्यकाल उपाध्यक्ष भइसक्नुभएका उहाँले उक्त पदमा उम्मेदवारी घोषणा गर्नुभएको हो । युवाको नेतृत्व विकास गर्नें र विश्वभर छरिएर रहेका नेपाली युवा सीपलाई मातृभूमि नेपालसम्म पुरयाउने आफ्नो चुनाबी नारा रहेको उहाँले बताउनुभयो । देशभित्र र बाहिर रहेका युवाको बृहत् संयुक्त सम्मलेन गरी एकअर्काको अनुभव साटासाट गर्ने तथा स्वदेशमै स्वरोजागर बन्न प्रेरित गर्ने आफ्नो योजना शाहले उल्लेख गर्नुभयो ।

एनआरएनको आठौँ विश्व सम्मेलन यही असोज २८ गतेदेखि काठमाडौँमा आयोजना हुँदैछ ।

प्रतिक्रिया

सम्बन्धित सामाग्री

फेसबुक