लन्डन । गैर आवासीय नेपाली संघ बेलायत (एनआरएनए यूके) को नयां नेतृत्व चुन्न शनिबार गरिएको निर्वाचन सकिएको छ । बिहान ८ बजेदेखि शुरु मतदान कार्यक्रम सांझ ८ बजे शान्तिपूर्ण रुपमा सकिएको हो । लन्डनस्थित हयारो, प्लमस्टिड, अल्डरसट एवं लेस्टर गरि चार ठाउंमा राखिएका मतदान केन्द्रहरुमार्फत ७८.४ प्रतिशत मतदाताले उत्साहजनक रुपमा मतदान गरेका छन् ।
निर्वाचन समितिका सदस्य सचिव रामशरण सिम्खडाका अनुसार, हयारो बुथमा ५२३ (७७ प्रतिशत), प्लमस्टिडमा ४८८ (७२ प्रतिशत), अल्डरसटमा १३८२ (८० प्रतिशत) र लेस्टरमा ४८९ (८० प्रतिशत) मत खसेको छ ।
अल्डरसट बुथका लागि १७२६, लेस्टर ६०६, हयारो ६७३ र प्लमस्टिडमा ६७१ मतदाता लिस्टमा थिए ।
सिम्खडाले निर्वाचन गराउने चुनौतिपूर्ण कामलाई एक तहसम्म ल्याउन सफल भएको बताए ।
मतगणना मतपेटिका आइसकेपछि सम्भवतः मध्यरातदेखि शुरु गरिनेछ ।
