सम्पादकीय : निर्णय गर्ने दिन

अध्यक्षका तीन उम्मेदवारहरू

युकेमा बसोबास गर्ने नेपालीहरुका लागि आज शनिबारको दिन विशेष छ । यहाँका संघसंस्थामध्ये धेरै नेपालीहरुले साझा संस्था मान्ने गैरआवासीय नेपाली संघ (एनआरएन) युकेको नयाँ नेतृत्वका लागि निर्वाचन हुँदैछ । विभिन्न २५ पदका लागि ५३ जना उम्मेदवार चुनावी मैदानमा होमिएका छन् । यसैगरी युकेबाट एनआरएनको अन्तर्राष्ट्रिय समितिमा प्रतिनिधित्व गर्ने तीन प्रतिनिधिको पनि चयन हुँदैछ । विभिन्न चार स्थानमा हुने मतदान र पोस्टल भोट गरी ३ हजार ६७६ मतदाताले मतदानमा भाग लिँदैछन् ।

एनआरएनभित्र युकेको स्थान आफैँमा ऐतिहासिक छ किनकि एनआरएन अभियानको श्रीगणेश युकेबाटै भएको हो । युरोपमा सबैभन्दा बढी नेपालीको बसोबास भएको देश पनि यही नै हो । यतिमात्र होइन खाडी मुलुकबाहेक सबैभन्दा धेरै नेपाली बसोबास गर्नेमध्ये एक देश पनि हो यो । त्यसैले गैरआवासीय नेपालीको अभियानमा युकेको महत्वपूर्ण स्थान र भूमिका रहने गरेको छ ।

युकेका नेपालीमा विविधता छ । उमेरका हिसाबले यहाँ धेरै वयोवृद्ध सेवानिवृत्त गोरखाहरु छन् । युवाहरु छन् । विद्यार्थीहरु छन् । पेशाकर्मीहरु छन् । विद्वानहरु छन् । गोरखा सैनिकहरु छन् । साँस्कृतिक रुपले न घर न घाटका भएका नवपुस्ता छन् । र हरेक दिन नयाँ पुस्ताको जन्म भइरहेको छ । जातिय बनौटका हिसाबले विविधता छ । भेगीय हिसाबले युके आफैँमा चार प्रान्तमा विभाजित छ र ती सबै प्रान्तमा नेपालीहरुको आवादी छ । यी सबैलाई नेतृत्व दिनसक्ने नेतृत्व आज चुन्नु परेको छ ।

समस्या पनि विविध छन् । कसैको नेपाली नागरिकताको निरन्तरता, कसैको युकेको स्टाटसको समस्या, मर्दापर्दाको चाहिने सहयोगको समस्या, भाषा,सँस्कृतिको बिर्सने समस्या, नेपालमा लगानी लैजाने समस्या आदि आदि । यी सबैलाई सम्बन्धित निकाय र पक्षसित प्रष्टरुपमा आवाज उठाउन सक्ने, एनआरएनको विश्वव्यापी सञ्जालमार्फत युकेका मुद्दा उठाउन नेतृत्व आज छान्न परेको छ ।

यति धेरै अपेक्षाका बीच एनआरएनको नेतृत्व भनेको समाजसेवा हो । भन्नुको मतलब उम्मेदवारहरुले के साँच्चिकै यहाँ बस्ने नेपालीहरुको समस्या र आवाजका लागि समय दिन सक्छन् ? चुनावका बेला विभिन्न प्रतिवद्धता गर्ने नेपाली चलन नयाँ होइन । अतः आज मत खसाउन अघि हरेक मतदाताले खुला दिमागले सोच्नुहोस् कुन उम्मेदवारमाथि तपाईलाई विश्वास लाग्छ कि उसले समाजलाई राम्रो गर्न सक्छ । समाजमा विभाजन होइन एकता गर्न सक्छ । व्यक्तिगत स्वार्थलाई होइन कि सामूहिक हित रोज्छ । त्यस्ता उम्मेदवारलाई आफ्नो अमूल्य मत दिनुहोस् । निर्णय तपाईको हातमा ।

प्रतिक्रिया

सम्बन्धित सामाग्री