काठमाडौँ, १७ साउन । काठमाडौँ उपत्यकामा आव २०७२-०७३ को तुलनामा गत आर्थिक वर्षमा अपराधको संख्यामा कमी आएको तथ्यांकले देखाएको छ ।
महानगरीय प्रहरी कार्यालय रानीपोखरीका अनुसार आव २०७२-०७३ मा छ हजार २४४ अपराधका घटना भएकोमा गत आवमा यसमा कमि भई पाँच हजार ९२४ घटना घटेका छन् ।
जिल्लागत आधारमा काठमाडौँमा सबैभन्दा बढी ७७ प्रतिशत, ललितपुरमा १५ प्रतिशत र भक्तपुरमा आठ प्रतिशत अपराधका घटना घटेको महानगरीय प्रहरी कार्यालयका निमित्त प्रमुख एंव प्रहरी नायब महानिरीक्षक बमबहादुर भण्डारीले जानकारी दिनुभयो ।
अपराधका आधारमा सबैभन्दा बढी सामाजिक घटना दुई हजार ८८४, ज्यान उद्योग ८६३, संगठित अपराध ६१४, आत्महत्याका ४६८, चोरीका ४२९, महिला बालबालिका विरुद्धका अपराध ३०१, सवारी ज्यान १७६ र विविध ६५ घटना घटेका छन् ।
पेशाका आधारमा घटनामा संलग्नमध्ये बेरोजगार पाँच हजार १८२, मजदुरी गर्ने दुई हजार २०६, कृषिमा संलग्न ३७२, व्यापारी १९४ र कर्मचारी २७ छन् । घटनामा संलग्न अभियुक्तमध्ये ६५ प्रतिशत बेरोजगार छन् ।
गत आवमा सबैभन्दा बढी अपराध भदौ महिनामा ५९६ तथा सबैभन्दा कम वैशाखमा ४१७ घटना घटेका छन् । त्यस्तै बारका आधारमा शुक्रबार र शनिबार सबैभन्दा बढी अपराध १६-१६ प्रतिशत तथा आइतबार र सोमबार १३-१३ प्रतिशत अपराधको घटना घटेका छन् ।
यस्तै समयका आधारमा साँझ ६ बजेदेखि १२ बजेसम्म सबैभन्दा बढी एक हजार ६१५ घटना घटेका छन् भने बिहान ६ बजेदेखि १२ बजेसम्म सबैभन्दा कम एक हजार २८० घटना घटेका छन् । उमेर समूहका आधारमा १६ वर्षमुनिका १२१ र २६ देखि ३५ वर्षसम्म उमेर समूहका दुई हजार ३३८ घटना भएका छन् ।
स्थानका आधारमा उपत्यकाको मुख्य शहरी क्षेत्रमा ४९ प्रतिशत, नयाँ बस्ती बसेका ठाउँमा ३६ प्रतिशत र ग्रामीण भेगमा १५ प्रतिशत घटना घटेका छन् । उपत्यकामा सबैभन्दा बढी बैंकिङ विद्युतीय अपराध, मानव बेचबिखन, लागुऔषध, संगठित अपराध र साइबर अपराधका घटना बढ्दो मात्रामा रहेको छ ।
ती मध्येपनि संगठित अपराध र साइबर अपराधका घटना मुख्य चुनौतीका रुपमा आउँदै गरेको प्रहरी नायब महानिरीक्षक भण्डारीले बताउनुभयो ।
१२३ को ‘पोलिग्राफ टेस्ट’
उपत्यकामा गत आवमा झुट बोलेको हो वा होइन भन्ने परीक्षण विधि ‘पोलिग्राफ टेस्ट’ १२३ जनामा गरिएको थियो ।
परीक्षण गरिएकामध्ये ६४ जनाले झुट बोलेको, ३८ जनाले झुट नबोलेको तथा २१ जनाको हकमा ठोस धारणा आउन नसकेको प्रहरी नायब महानिरीक्षक भण्डारीले जानकारी दिनुभयो ।
यौनजन्य हिंसा अनुगमन गरिने
सार्वजनिक सवारीमा विशेषगरी महिलामाथि छुने, जिस्काउनेजस्ता यौनजन्य हिंसा बढ्दै गएपछि प्रहरीले बुधबारबाट त्यसलाई न्यूनीकरण गर्न अभियान सुरु गर्ने भएको छ ।
पहिलो चरणमा तीन महिनाका लागि सार्वजनिक सवारीसाधनमा यौनजन्य हिंसा न्यूनीकरणका लागि अभियान सुरु गर्ने र त्यसको प्रभावकारिताका आधारमा त्यसको स्वरुपमा परिमार्जन गरिने प्रहरी नायब महानिरीक्षक भण्डारीले जानकारी दिनुभयो ।
कार्यक्रमअन्तर्गत बसपार्कमा सचेतनामूलक कार्यक्रम सञ्चालन गर्ने तथा सवारीसाधनमा गोप्य रुपमा निगरानी बढाइने भएको छ ।
