लन्डन । अंध्यारो भएपछि आफ्नो घरभित्रै बस्ने संसारका कयौं ठाउं भन्दा २४ सै घण्टा नसुत्ने मुख्य शहरहरु बढ्ने क्रम जारी छ । त्यो पंक्तिमा छ लन्डनसहित बेलायती प्रमुख शहर पनि । खासमा कहिल्यै सुत्दैन बेलायत । बढ्दो नाइट लाइफ कल्चरले बेलायत मनोरञ्जन साथै व्यापार अभिवृद्धि र रोजगारी दिन उत्तिकै सफल छ ।
बेलायतको रात्री व्यवसाय करिब ७० अर्ब पाउन्ड बराबर रहेको तथ्यांक छ । रात्री क्लब, बार, रेष्टुरेन्टहरुले सरकारको राजस्वमा महत्वपूर्ण योगदान दिइरहेका छन् । रात्री समय काम गर्ने व्यवसायीहरुको संघका अनुसार बेलायतको कुल ग्राहस्थ उत्पादन (जिडिपी) को ६ प्रतिशत योगदान रात्री व्यवसायले गरेको छ भने यसले करिब १३ लाख मानिसलाई रोजगारी दिएको छ ।
रातको समयमा मनोरञ्जन गर्ने बेलायती संस्कारको एक अभिन्न अंग नै हो । यसै कुरालाई ध्यानमा राखी लन्डनभर जमिनमुनी गुड्ने रेल (अन्डरग्राउण्ड) सेवा विकेन्डमा चौबीसै घण्टा विस्तार गरिएको छ । यस्तो रात्री रेल सेवा विस्तारले वार्षिक ३६ करोड पाउन्ड बेलायती अर्थतन्त्रमा सहयोग पुग्ने बताइएको छ ।
बेलायतमा रात्रीकालिन समयमा मानिसहरु सामाजिक जमघट गरि मनोरञ्जन लिने प्रचलन छ । राजधानी लन्डनमा हजारौं बार, क्लव, पब, लाउन्ज छन् । विशेष गरि, सेन्ट्रल लन्डनका सोहो, कोभेन्ट गार्डेन, लेस्टर स्क्वायर, पिकाडेली सर्कस नाइट लाइभका प्रमुख केन्द्र मानिन्छ । वीकेन्डमा त बेलायती रातभर झुमिरहेका हुन्छन् नशा र संगीतमा ।
रातको समयमा मदिरा सेवन तथा लागूऔषधबाट हुने अपराध बढ्नुको सट्टा रात्रीकालिन अर्थतन्त्रले अपराध सन् २००२ भन्दा ३८ प्रतिशत न्यून भएको तथ्यांकले देखाएको छ । यसका साथै रातमा ब्यापार हुने स्थानहरु अरु सुरक्षित बन्दै गएको पनि जनाइएको छ ।
रात्रीकालिन अर्थतन्त्रको नियमलाई थप कडाइ गर्दा अत्यधिक मदिरा सेवन अथवा हिंसात्मक अपराध कम भएको प्रमाण नदेखिएको व्यवसायी संघले बताएको छ । अधिक मदिरा तथा लागूऔषधको सेवन नाइट क्लब, पब, रेस्टुरेन्ट आदि ठाउं भन्दा बाहिर बढि हुने भएकाले रात्रीकालिन ब्यापारले यस्तो कार्य बढाउने काम नगरेको जिकिर संघको छ ।
संघले बेलायती सरकारलाई योजना तथा लाइसेन्सको नियमलाई पुनरावलोकन गर्न आग्रह समेत गरेको छ ।
बेलायतमा ८ मा एकजना रातको समयमा काम गर्ने गरेको नयां तथ्यांकले देखाएको छ । राती काम गर्नेको संख्या तीन करोड भन्दा बढि भएको र यो संख्या बढ्ने क्रम जारी रहेको तथ्यांकले देखाएका छन् ।
महिलाहरु केयर, वेट्रेस, नर्सिङमा छन् भने पुरुषहरु सेक्युरिटी, पुलिस र यातायातमा काम गर्ने पाइएको छ ।
बेलायती ट्रेड युनियनको मत भने अलिक फरक छ । उसले रात्रीकालिन कामले पारिवारिक जीवन अवरोध भएको बताउंदै राती काम गर्ने कामदारको योगदानको थप कदर हुनुपर्ने बताएको छ र उनीहरुको अधिकार तथा सुरक्षा सुनिश्चित गरिनुपर्नेमा समेत जोड दिएको छ ।
रात्रीकालिन समयमा नियमित काम गर्ने मानिसको स्वास्थ्यबारे अत्यधिक वहस हुंदै आएको छ । राती ११ देखि बिहान ६ बजे सम्म तीन घण्टाभन्दा बढि काम गर्नेलाई रात्री कामदार भनेर बेलायत सरकारले वर्गीकरण गरेको छ । अल्पसंख्यक तथा आप्रवासी पृष्ठभूमिका मानिस तथा युवाहरु नै बढि राती काम गर्ने कामदार छन् ।
व्यस्त जीवनमा आ आफ्नो रोजाई अनुसार जुनसुकै समयमा मनोरञ्जन लिने स्वतन्त्रता भए अर्थतन्त्रमा सकारात्मक प्रभाव पार्न सक्ने बेलायतले प्रमाणित गरेको छ । तर, रातीमा हुने विकृति निस्तेज गरि अपराध कम गर्नु सबैको दायित्व भएको बेलायत ट्रेड युनियनको धारणा छ ।
