राष्ट्रिय हितको पक्षमा संविधान संशोधन गर्न एमाले तयार

काठमाडौँ, २ कात्तिक । नेकपा (एमाले)का नेता भीम रावलले राष्ट्रिय हितको पक्षमा संविधान संशोधन गर्न एमाले तयार रहेको बताउनुभएको छ ।

रिपोर्टर्स क्लबमा आज आयोजित साक्षात्कारमा नेता रावलले थप्नुभयो–“संविधान गतिशील दस्तावेज भएकाले संविधानमा संशोधन हुनु हुँदैन भन्ने मान्यता एमालेको छैन् । तर संविधान संशोधन गर्नुपर्छ भनेर आवाज उठाइरहेको सत्ताधारी दल र मधेसवादी दलले संविधान संशोधनको प्रस्ताव अझै अगाडि बढाएको छैन र एमालेसँग औपचारिक कुरा पनि गरेको छैन ।”

नेता रावलले सरकारले एक वर्षभित्र प्रदेश, स्थानीय निकायको निर्वाचन कार्यतालिका ल्याएमा त्यसमा एमालेले सहयोग गर्ने चर्चा गर्दै तर उक्त निर्वाचन निष्पक्ष, स्वतन्त्र तथा धाँधलीरहित हुनुपर्नेमा जोड दिनुभयो ।

उहाँले अघिल्लो सरकारले तीनवटै निकायको निर्वाचन कार्यतालिका सार्वजनिक गरेको तर वर्तमान सरकारले निर्वाचन कार्यतालिका सार्वजनिक गर्न नसकेकाले सत्तारुढ दल संविधान कार्यान्वयनप्रति गम्भीर नरहेको बताउनुभयो ।