नेपालको विकासमा राष्ट्र सङ्घबाट प्राप्त सहयोगको सराहना

काठमाडौँ, १ कात्तिक । राष्ट्रपति विद्यादेवी भण्डारीसँग संयुक्त राष्ट्र सङ्घका उपमहासचिव एवम् राष्ट्रसङ्घका महासचिव बान की–मुनका ‘विकासका लागि वित्तीय नवप्रवत्र्तनसम्बन्धी विशेष सल्लाहकार’ प्रा डा फिलिप डुस्ट ब्लाजीले आज अपराह्न राष्ट्रपति कार्यालयमा शिष्टाचार भेट गर्नुभयो ।

त्यस अवसरमा उहाँहरूबीच नेपाल र राष्ट्र सङ्घबीचको सम्बन्धका साथै नेपालको सामाजिक–आर्थिक विकासमा राष्ट्र सङ्घले निर्वाह गरेको भूमिकाबारे विचारविमर्श भएको यहाँस्थित फ्रान्सेली राजदूतावासले जनाएको छ । राष्ट्रपति भण्डारीले विश्व शान्ति स्थापना तथा नेपालको विकास प्रयासमा राष्ट्र सङ्घबाट निरन्तर प्राप्त सहयोगको सराहना गर्नुभयो ।
विश्व स्वास्थ्य सङ्गठनका भावी महानिर्देशकका लागि फ्रान्सले आफूलाई उम्मेदवार घोषणा गरेपछि नेपालको समर्थन जुटाउन प्रा ब्लाजी नेपाल भ्रमणमा आउनुभएको हो । राष्ट्रपतिलाई उहाँले आफ्नो उम्मेदवारीबारे पनि अवगत गराउनुभएको थियो । भेटमा नेपालका लागि फ्रान्सका राजदूत इभ कारमोना, राष्ट्रपतिको कार्यालय, परराष्ट्र मन्त्रालय र यहाँस्थित फ्रान्सेली राजदूतावासका उच्च अधिकारीको सहभागिता थियो ।