काठमाडौँ, २६ असोज । बडादसैँअन्तर्गत आश्विन शुक्ल तिथि एकादशीको दिन आज पनि आफ्ना मान्यवरबाट टीका र जमरा तथा आशीर्वाद लिने क्रम जारी रह्यो ।
हिन्दू धर्मावलम्बीहरुको महान् चाड दसैँको मुख्य टीका दशमीको दिन भए पनि टाढाटाढा जानुपर्नेहरुले कोजाग्रत पूर्णिमाका दिनसम्म यो क्रम जारी राख्छन् । काठमाडौँ उपत्यकाभित्र र बाहिरबाट टीका थापेर आउने जानेको ओहोरदोहोर देख्न सकिन्छ ।
दसैँ मनाउन काठमाडौँ उपत्यका बाहिर गएकाहरु पनि क्रमशः आउन थालेकाले आजबाट काठमाडौँका सडकमा सवारीको मात्रा सामान्य बढेको देखिन्छ तर सरकारी बिदा र बजारहरु आंशिक खुल्ला भएकाले खासै चहलपहल छैन ।
