शुक्रबार, कार्तिक ७ २०७७ | Fri, October 23, 2020
नेपालको समय: ०६:०० | UK Time: 01:15

बेचिएका नेपाली बालबालिकाको उद्दारमा सघाउन लण्डन म्याराथन दौड्दै

वीनेपाली
२०७२ चैत ८ गते २२:४९

 

लण्डन । विश्वासदीप तिगेला नाम एक परिचय अनेक । साहित्यकार, पत्रकार, राजनीतिकर्मी, समाजसेवी, अभियानकर्मी, एनआरएन नेता । यस्ता अनेकन पहिचान छ उनको । उनै तिगेला अहिले भारतमा बेचिएका नेपाली बालबालिकाको उद्दारमा सहयोग गर्न लण्डन म्याराथन दौड्दैछन् ।
पूर्व गोरखा सैनिक तिगेलाको बानी हरेक साल केही न केही सामाजिक कार्य गर्ने परिसकेको छ । पुस्तक छपाउन नसकेका करिब एक दर्जन साहित्यकारको पुस्तक छपाइदिए उनले केही वर्ष ।
साहित्य, राजनीतिका अलावा दौड उनको रुचिको अर्को क्षेत्र हो । आर्मीमा रहँदै उनले वेल्समा ३२ किलोमिटर लामो पहाड चढ्ने, ओर्लने दौड पूरा गरिसकेका छन् । यसबाहेक तन्दुरुस्त रहन बेलाबेलामा दौडिरहन्छन् । दौडमा रुचि राख्नेलाई लण्डन म्याराथन नौलो नाम होइन । विश्वका विभिन्न भागबाट साे म्याराथनमा भाग लिन मानिसहरु आउने गरेकोमा यहीँ बस्दा भाग किन नलिने भन्ने तरंग तिगेलाको मनमा आयो ।
तर कसको सहयोगका लागि दौड्ने ? तिगेलाले बेलायतीहरुले स्थापना गरेको एस्थर बेञ्जामिन ट्रष्ट सम्झे । जसले नेपालबाट भारतका विभिन्न सर्कसहरुमा बेचिएका बालबालिकालाई उद्दार गरी पुनर्जीवन दिने गरेको छ । यहाँका नागरिकले हाम्रा लागि काम गरेका छन् भने हामीले किन सहयोग नगर्ने भन्ने सोचाइ उनको मनमा आयो ।
एनआरएन आइसिसीका सदस्य, विश्व नेपाली साहित्य महासंघका अध्यक्ष रहेका तिगेला दुवै संस्थाको प्रतीक चिन्ह लिएर म्याराथन दौड्दै छन् । दर्जनौँ संघ संस्थामा आवद्ध र आफैँ पनि पूर्णकालिन जागिरे तिगेलाको यो आँटलाई मान्नै पर्छ । उनी भन्छन्, “हप्तामा तीन दिन साढे दुई घण्टाको दरले अभ्यास गर्दैछु ।”
तिगेलाले दौडबाट करिब ३ हजार ५०० पाउण्ड सहयोग संकलन गर्ने लक्ष्य राखेका छन् । उनले सहयाेगका लागि सबैमा अपील पनि गरेका छन् ।
अप्रिल २४ मा लण्डनमा हुने २६.२ माइल लामो सो म्याराथनमा उनकाे लक्ष्य चाहिँ छोरीको रेकर्ड तोड्ने रहेकाे छ । गतवर्ष लण्डन म्याराथन दौडेकी उनकी छोरी कल्पना लिम्बुले ४ घण्टा ३९ मिनेटमा साे म्याराथन पूरा गरेकी थिइन् ।

BT 1

प्रतिक्रिया

सम्बन्धित सामाग्री

फेसबुक