तस्वीर मिलन गुरूङ
लन्डन । यूकेमा वसन्त ऋतुको आगमनसंगै यहां फुटबल प्रतियोगिता शुरु हुन लागेको छ । यसवर्ष यो क्रम सहारा यूकेको एभरेष्ट कपबाट यही अप्रिल २ मा शुरु हुंदैछ ।
रेडिङस्थित राब्सन रिक्रियसनल ग्राउण्डमा हुने सो प्रतियोगितामा तीन अलग अलग समूहमा खेलाइने आयोजकले बताएका छन् । आइतबार सो सम्बन्धमा जानकारी दिन अल्डरसटमा पत्रकार सम्मेलन आयोजना गरियो ।
सो सम्मेलनमा दिइएको जानकारी अनुसार १७ वर्षमाथि, ४० वर्षमाथि र ५० वर्षमाथि तीन उमेर समूहमा सो प्रतियोगिता खेलाइने छ । १७ वर्ष माथिको उमेर समूहको प्रतियोगिता ९ ‘ए’ साइड लिग कम नकआउट हुनेछ भने ४० वर्ष माथिको भेटेरान समूहको प्रतियोगिता ७ ‘ए’ साइडको नकआउट हुने छ ।
मुख्य विधामा १६ वटा समूहले भाग लिने भएको छ । आइतबारै गरिएको टिम ड्रमा टीम ‘ए’ मा प्लमस्टिड युथ, १० क्यूओजीएलआर, टेडफोर्ड एण्ड बुलफोर्ड (टी एण्ड बी), रोयल सिताङ स्याण्डहर्सट छन् । त्यस्तै टीम ‘बी’ मा मंगोलियन भान्जा, एफसी तोङबा, मोर्डन एफसी, फोल्कस्टन युथ छन् भने टीम ‘सी’ मा जेडी ब्वाइज, सिग्नलर एफसी, रोयल ग्रीनवीच एफसी, गोरखा वारियर माण्डले, ब्रेकन छन् । टीम ‘डी’ मा रेडिङ युनिटी, क्यूएएफटी, बेजिङस्ट्रोक युथ र फिली व्वाइज रहेका छन् ।
भेटेरानतर्फ भाग लिने टोलीहरुमा एफसी केन्ट, हिमाली एफसी, एचके ४०, पोखरा युनाइटेड, पांचथर एफसी, जीएसके, सहारा यूके र कोल्मा बहाकोट छन् ।
मुख्य प्रतियोगिताका विजेता टोलीलाई १ हजार ५०० पाउण्ड र कप, भेटेरानका विजेतालाई ८०० पाउण्ड र कप तथा ५० वर्षमाथिको गोल्डेन भेटेरानतर्फको विजेतालाई कप र व्यक्तिगत ट्रफी पुरस्कार दिइने छ । यस्तै, उपविजेताहरुमा मुख्य प्रतियोगिताको उपविजेतालाई ७५० पाउण्ड, भेटेरानका उपविजेतालाई ४०० पाउण्ड र गोल्डेन भेटेरानका उपविजेतालाई व्यक्तिगत ट्रफी र सर्टिफिकेट दिइने छ ।
सहारा यूकेका अध्यक्ष दिलिपकुमार गुरुङको अध्यक्षता र महासचिव कुमार गुरुङको संचालनमा भएको सो सम्मेलनमा स्पोर्टस सचिव मनोज गुरुङले प्रतियोगिताको तयारीका बारेमा, लेफ्टिनेण्ट कुसाङ गुरुङले टीम ड्र र कपको इतिहासका बारेमा, मिडिया सचिव वाचस्पति रेग्मीले मिडिया कभरेजका बारेमा जानकारी दिएका थिए ।
सन् २००८ मा सहारा यूकेले सहारा कपका नाममा सो प्रतियोगिता शुरु भएकोमा सन् २०१२ मा त्यसलाई नाम परिवर्तन गरी एभरेष्ट कपका नाममा खेलाउन थालिएको हो । विभिन्न कारणले तीन वर्ष अवरुद्ध सो प्रतियोगिता यस वर्षबाट पुनः खेलाइन लागेको हो ।
कार्यक्रममा हालै नेपाल पत्रकार महासंघ यूकेको अध्यक्ष र कोषाध्यक्षमा निर्वाचित नरेश खपाङगीमगर र पूर्ण गुरूङलाई क्लवका अध्यक्ष दिलिप गुरूङले खादा ओढाइ बधाइ दिएका थिए । यस्तै मिडिया सेक्रेटरी वाचस्पति रेग्मी र सल्लाहकार योगकुमार फगामीलाई पनि आदा ओढाइ स्वागत गरिएको थियो ।
