प्रहरी महानिरिक्षकसहितको टोलीलाई एनआरएनए यूकेको सम्मान

लन्डन । गैर आवासीय नेपाली संघ, बेलायत (एनआरएनए यूके) ले हाल बेलायत भ्रमणका रहेका नेपाल प्रहरीका उच्च पदस्थ अधिकारीहरुको सम्मानमा एक कार्यक्रम गरेको छ । फार्नबोरोस्थित गोर्खा प्यालेस रेष्टुरेन्टमा बिहीवार सांझ रात्रीभोजसहित कार्यक्रम भएको हो ।

प्रहरी महानिरिक्षक उपेन्द्रकान्त अर्यालसहित विशिष्ठ प्रहरी अधिकृतहरुलाई एनआरएनए यूके अध्यक्ष मुछेत्र गुरुङले सम्मान गरेका हुन् ।

प्रहरी अधिकृतहरुको उक्त टोली संघीय ढांचामा प्रहरीको कार्यसम्पादन प्रणालीबारे अध्ययन गर्न गत सोमबार लन्डन आएको हो ।

उक्त अवसरमा प्रहरी महानिरिक्षक अर्यालले संघप्रति आभार व्यक्त गर्दै अब नेपाल प्रहरीको संरचना परिवर्तन सम्वन्धि जानकारी दिएका थिए । अर्यालले बेलायत प्रहरीबाट संघीयता सम्वन्धि जानकारी लिन आफूहरु यहां आएको अवगत गराए ।

एनआरएनए यूके महासचिव विजय विक्रम लिंग्देनले सञ्चालन गरेको उक्त कार्यक्रममा एनआरएनए यूके महिला उपाध्यक्ष शान्ति थापा कुंवरले शुभकामना दिएकी थिइन् ।

उक्त अवसरमा सहभागीले अर्यालसहित अन्य अधिकृतहरुसंग नेपाल प्रहरीबारे प्रश्न 
राखेका थिए ।

कार्यक्रममा एनआरएनए यूके उपाध्यक्ष योगकुमार फगामी, सहकोषाध्यक्ष ललित न्यौपाने, पूर्व अध्यक्ष सूर्य गुरुङ, सल्लाहकारहरु एलएन पाण्डे, मोहन गुरुङ, गणेश गुरुङ, ग्रेटर रसमोर नेपलिज कम्युनिटीका ओमप्रसाद थापा, जीव बेल्वासे, रन्जिता मल्ल, तमुधिं यूके अध्यक्ष सूर्जे (रामचन्द्र) गुरुङ, छवीमाया पुन, फोटो पत्रकार मिलन तमु लगायत सहभागी थिए ।

तस्विरहरुः मिलन तमु