कोइरालाको अस्तु त्रिबेणी नदीमा विसर्जन

नवलपरासी, ९ फागुन । नेपाली काँग्रेसका सभापति स्व सुशील कोइरालाको अस्तु आज त्रिबेणी नदीमा पनि विसर्जन गरिएको छ ।पूर्वप्रधानमन्त्री कोइरालाको १३औँ दिनको पुण्य तिथिका अवसर पारेर त्रिबेणी नदीको त्रिबेणी घाटमा अस्तु विसर्जन गरिएको हो ।काठमाडौँबाट ल्याइएको पूर्वप्रधानमन्त्री कोइरालाको अस्तु नवलपरासीको त्रिबेणीधामस्थित त्रिबेणी नदीमा विसर्जन गरियो ।
सो अवसरमा पार्टीका कन्द्रीय नेता रामशरण महत, देवेन्द्रराज कँडेललगायत जिल्लाका नेता कार्यकर्ता सहभागी थिए ।

संविधान कार्यान्वयनको जिम्मा काँग्रेसको काँधमा ः नेता महत

नेपाली काँग्रेसका नेता डा रामशरण महतले संविधान कार्यान्वयनको सबैभन्दा ठूलो जिम्मा नेपाली काँग्रेसको काँधमा आएको बताएका छन् । उनले संविधान निर्माणमा अग्रणी भूमिका खेलेको काँग्रेसले अब सबैको सहमति र सहकार्यमा संविधान कार्यान्वयन गर्न काँगे्रसले अगुवाइ गर्नुपर्ने विचार व्यक्त गरे ।

नेपाली काँग्रेसका सभापति स्व सुशील कोइरालाको १३औँ दिनको पुण्य तिथिमा नेपाली काँग्रेस नवलपरासीद्वारा आज परासीमा आयोजित श्रद्धाञ्जलिसभामा बोल्दै नेता महतले कोइरालाको निधनले पार्टी र मुलुकलाई नै अपुरणीय क्षति पुगेको विचार राखे ।
सोही अवसरमा पार्टीका अर्का नेता गोपालमान श्रेष्ठले पार्टी र देशको हितका लागि कोइरालाले देखाएको बाटो सबैले रोज्नुपर्ने विचार राखेका थिए ।