काठमाडौँ, ५ फागुन । व्यवस्थापिका संसद्को चालु अधिवेशन १३९ दिन सञ्चालन भई आजदेखि अन्त्य भएको छ ।

अधिवेशन अन्त्यसम्बन्धी राष्ट्रपति कार्यालयबाट प्राप्त पत्र सभामुख ओनसरी घर्तीले व्यवस्थापिका संसद्को आजको बैठकमा पढेर सुनाउनुभएको थियो । पत्रमा अधिवेशन आजै रातिबाट अन्त्य हुने उल्लेख छ ।

असोज १५ गतेदेखि सुरु भएको यस अधिवेशनमा राष्ट्रपति, उपराष्ट्रपति, प्रधानमन्त्री, सभामुख तथा उपसभामुखको चयन भएको थियो ।

संविधानसभाबाट रुपान्तरित व्यवस्थापिका संसद्को चालु अधिवेशनको पहिलो बैठकले व्यवस्थापिका संसद्को आन्तरिक कार्यविधि, २०७२ लाई पारित गरेको थियो ।

अधिवेशनमा विभिन्न शीर्षकका ३८ वटा विधेयक प्राप्त भएकोमा छवटा पारित भएका थिए ।

अधिवेशनको ४१ दिनमा ४४ पटक बैठक बसेको र खास कामका लागि ३७ घन्टाभन्दा बढी समय खर्च भएको थियो । यही अधिवेशनमा नेपालको संविधानको पहिलो संशोधनसम्बन्धी विधेयक पारित भएको थियो ।