विद्या भण्डारी
काठमाडौँ, २७ माघ । राष्ट्रपति विद्यादेवी भण्डारीसँग भुटानका गृह एवम् सांस्कृतिक मामिलामन्त्री दावा ग्याल्तसेनले शिष्टाचार भेटवार्ता गर्नुभएको छ ।
राष्ट्रपति कार्यालय शीतल निवासमा भएको भेटवार्तामा भूटानी राजदूत भी नाम्ग्याल र अन्य भुटानी अधिकारीको उपस्थिति रहेको राष्ट्रपति कार्यालयका सहायक प्रवक्ता ध्रुवराज शर्माले जानकारी दिनुभयो ।
भुटानी गृहमन्त्री दावा पूर्वप्रधानमन्त्री सुशील कोइरालाको दुःखद् निधनप्रति समवेदनामा प्रकट गर्न आजै यहाँ आउनुभएको थियो ।
यसैबीच, प्रधानमन्त्री केपी शर्मा ओलीसँग भुटानका गृह एवम् सांस्कृतिक मामिला मन्त्रीले शिष्टाचार भेटवार्ता गर्नुभएको छ ।
प्रधानमन्त्री निवास बालुवाटारमा आज साँझ भएको भेटवार्तामा आपसी हित र दुई मुलुकको सम्बन्धका बारेमा छलफल भएको थियो ।
प्रधानमन्त्री ओलीले भुटानले पछिल्लो दिनमा गरेको आर्थिक प्रगतिको बारेमा उच्च प्रशङ्सा गर्नुभएको उहाँका परराष्ट्रविज्ञ गोपाल खनालले जानकारी दिनुभयो ।
सो अवसरमा नेपाल र भुटानबीचको द्विपक्षीय सम्बन्धका विभिन्न पक्षका बारेमा छलफल भएको थियो ।
यसैगरी उपप्रधानमन्त्री एवम् परराष्ट्रमन्त्री कमल थापासँग पनि भुटानी गृहमन्त्रीले भेटवार्ता गर्नुभएको थियो । सो अवसरमा आपसी हितका विभिन्न विषयमा छलफल भएको थियो ।
भुटानीमन्त्री ल्यान्पो पूर्वप्रधानमन्त्री सुशील कोइरालाको दुःखद् निधनप्रति समवेदनामा प्रकट गर्न आजै यहाँ आउनुभएको थियो ।
