काठमाडौँ, २६ माघ । नेपाली कांँग्रेसले पार्टी सभापति सुशील कोइरालाको निधनले कांँग्रेस पार्टीका नेतृत्व र कार्यकर्ता पङ्क्ति मर्माहत र स्तब्ध भएको जनाएको छ ।
पार्टीका कावा सभापति रामचन्द्र पौडेलको अध्यक्षतामा आज बसेको आकस्मिक बैठकले सभापति कोइरालाले राष्ट्रियता, लोकतन्त्र र समाजवादप्रति अविचलित, निष्ठा, सादा र सरल जीवनशैली तथा सुदृढ चारित्रिक र नैतिक बलद्वारा राष्ट्रिय राजनीतिमा शीर्षस्थ स्थान बनाउनुभएको जनाएको छ ।
देशका एक मूर्धन्य, संविधान निर्माणका निर्णायक तथा जनताका लोकप्रिय नेता पार्टी सभापति एवम् पूर्वप्रधानमन्त्री कोइरालाप्रति कांग्रेस केन्द्रीय कार्यसमितिको बैठकले भावपूर्ण श्रद्धाञ्जलि अर्पणसमेत गरेको छ । बैठकले स्व कोइरालाका परिवारजनप्रति हार्दिक समवेदना प्रकट गरेको छ ।
बैठकले कोइराला पार्टीका लागि मात्र होइन, मुलुकका निम्ति बोली र व्यवहारमा एकरुपता भएको उदाहरणीय नेता भएको उल्लेख गर्दै कोइरालालाई देश र जनताले अत्यन्त जटिल बन्दै गएको सङ्क्रमणकालीन राजनीतिको बेला संविधानसभाबाट नेपालको संविधान जारी गर्ने अभियानको मुख्य नेताका रुपमा चिरपर्यन्त सम्झिने उल्लेख गरेको छ । संविधान निर्माणपछि पनि संविधानको कार्यान्वयन र यसको निरन्तर परिमार्जनद्वारा संविधानको व्यापक स्वीकारोक्ति बढाउन नेता कोइरालाले संविधान संशोधन प्रक्रियाको समेत नेतृत्व गर्दै आन्दोलनरत सबै पक्षलाई एकता, सहमति र सहकार्यको बाटामा संलग्न गराउन महत्वपूर्ण भूमिका निर्वाह गरेको पार्टीले जनाएको छ ।
पार्टीले मधेसमा आन्दोलनरत पक्षलाई निरन्तर संवाद र वार्तामा संलग्न राखेर हिमाल, पहाड, मधेस र तराईका जनताका भावना र पारस्परिक एकतालाई सुदृढ बनाउन र सम्मानजनक निकास खोज्न जीवनको अन्तिम घडीसम्म कोइरालाले निर्वाह गर्नुभएको जनाउँदै शोकको यस घडीमा शान्ति र स्थिरतातर्फ फर्किंदै गएको यात्रालाई सुरक्षित ढङ्गबाट गन्तव्यसम्म पुरयाउने सङ्कल्प गरेको छ ।
पार्टी महाधिवेशनको अन्तिम चरणमा रहँदा आफ्ना प्रिय सभापति र अभिभावकलाई गुमाउनुपरेको पीडाबाट आहत पार्टी कार्यकर्तालाई सभापतिले देखाउनुभएको बाटो, निष्ठा, नैतिकता र सरल जीवन पद्धतिलाई पार्टीको प्रेरणा र पुँजीका रुपमा ग्रहण गर्न बैठकले आग्रहसमेत गरेको छ ।
पार्टीले आफ्ना सभापति स्व कोइरालाको अन्तिम संस्कार बुधबार साँझ आर्यघाटमा राष्ट्रिय सम्मानसहित गरिने निर्णय गरेको छ । स्व कोइरालाप्रति अन्तिम श्रद्धाञ्जलि प्रकट गर्ने प्रयोजनका निम्ति यही माघ २७ गते अपराह्न २ बजेदेखि अन्त्येष्टिका लागि शवयात्रा आरम्भ गर्ने निर्णय गरिएको छ । स्व कोइरालाको शवयात्रा मार्ग त्रिपुरेश्वर–पुतलीसडक–कमलपोखरी–मैतीदेवी–गौशाला हुँदै पशुपति आर्यघाट पुग्ने छ ।
पार्टी मुख्य सचिव ऋषिकेश तिवारीका अनुसार पार्टी केन्द्रीय कार्यालय सहित देशभरिका पार्टी कार्यालयमा १३ दिनसम्म शोकपुस्तिका राखिने र तेह्राँै दिनका दिन ७५ वटै जिल्लामा अन्तिम संस्कारपछिको भष्म प्रवाह गर्ने निर्णय गरिएको छ । स्व कोइरालाप्रति श्रद्धाञ्जलि र सम्मान प्रकट गर्न आजदेखि आगामी फागुन ९ गतेसम्म पार्टी केन्द्रीय कार्यालय र देशभरिका पार्टी कार्यालयमा पार्टीको झन्डा झुकाइने र कुनै पनि अन्य औपचारिक कार्यक्रम आयोजना नगरिने निर्णय गरिएको छ ।
त्यसैगरी पार्टीले आजैदेखि आगामी फागुन ३ गतेसम्म पार्टीको केन्द्रीय कार्यालयसहित सम्पूर्ण कार्यालय र भ्रातृ संस्थाका कार्यालय बन्द गर्ने तथा फागुन ९ गते सबै जिल्लामा श्रद्धाञ्जलिसभा आयोजना गर्ने भएको छ । काठमाडौँ उपत्यकाका लागि केन्द्रीय कार्यालयको आयोजनामा काठमाडौँ, भक्तपुर र ललितपुरको सहभागितामा काठमाडौँमा संयुक्त श्रद्धाञ्जलिसभा गर्ने पार्टीले जनाएको छ ।
