जिरी, २५ माघ । दोलखाको जिरीमा पुनः हिमपात भएको छ । यसअघि माघ १२ गते पनि जिरी क्षेत्रमा हिमपात भएको थियो । आज बिहानदेखि परेको वर्षसँगै दिउँसो १२ बजेदेखि जिरी र आसपासको क्षेत्रमा हिमपात भइरहेको छ ।

हिमपातका कारण जिरीबाट विभिन्न ठाउँका लागि छुट्नु पर्ने यात्रुबाहक बस पनि प्रभावित बनेको छ । जिरीबाट रामेछापको बाम्तीभण्डार, प्रितीलगायतका क्षेत्रका लागि छुटेका यात्रुबाहक बस रामेछापको ठोसेमा रोकिएको छ भने जिरीबाटै दोलखाको श्यामा र मालीको लागि छुट्नु पर्ने यात्रुबाहक बस पनि जिरी बजारमा नै रोकिएको छ ।

हिमपातपछि अत्यधिक चिसोका कारण जनजीवन अत्यन्त कष्टकर बनेको छ भने विद्यालय पनि आज बन्द भएको छ । गत वैशाखको भूकम्पपछि जस्तापाता र त्रिपालको अस्थायी टहरामा बसोबास गर्दै आएका सर्वसाधारणको जनजीवन बढी प्रभावित बनेको हो । चिसोबाट बच्नका लागि सर्वसाधारणले आगो बालेर दिनभर घरभित्र नै बसेका छन् ।

जिरीको खावा, हनुमान्ते, च्योदुङ पटासे, ठूलोढुङ्गा, माली, श्यामा र रामेछापको तामेडाँडा, ठोसे, देउराली शेर्दिङ, गुम्देल गर्जाङलगायतको क्षेत्रमा बाक्लो हिउँ परेको छ ।