लन्डन । निजी भ्रमणका सिलसिलामा लन्डन आएका बेला नेपालका एकमात्र अर्वपति विनोद चौधरीसंग यहांका व्यापारीले भेटेका छन् । चौधरी ग्रुपका अध्यक्ष चौधरी बसेको ताज होटलमा गएर व्यवसायीले बुधवार दिउसो उनलाई भेटेका हुन् ।

भेटमा ब्रिटेनको सर्वदलीय संसदीय समितिका नेपाल अध्यक्ष सांसद वीरेन्द्र शर्मासहित सफल व्यवसायीहरु उत्तम नेपाल, पशुपति भण्डारी, वी पी खनाल, किशोर सापकोटा, अमोल गुरुंग, प्रशान्त कुंवर लगायत थिए । कुंवरले भेटघाटको प्रवन्ध मिलाएका हुन् ।

करिब डेढ घण्टा लामो छलफलमा नेपालमा लगानीका सम्भाव्यता र भारतको अघोषित नाकाबन्दीले पारेको प्रभावबारे छलफल भएको एक सहभागीले जनाए । सहभागीबीच दवाव समूह गठन गरेर नाकाबन्दी खुलाउन पहल गरिनुपर्ने चर्चा चलेको थियो । चौधरी बुधवार सांझ नै नेपाल फर्किएका छन् ।

यसैबीच, उद्योगपति चौधरीलाई पितृशोक परेको छ । उनका बुवा लुनकरणदास चौधरीको ९४ वर्षको उमेरमा बिहीबार निधन भएको हो ।