काठमाडौँ, २० माघ । भारतका राष्ट्रपति प्रणव मुखर्जीले प्रधानसेनापति राजेन्द्र क्षत्रीलाई भारतीय स्थल सेनाको मानार्थ महारथी दर्जाको दर्ज्यानी चिह्न प्रदान गर्नुभएको छ ।
राष्ट्रपति भवनमा आज आयोजित विशेष समारोहमा प्रधानसेनापति क्षत्रीलाई भारतीय राष्ट्रपतिले मानार्थ महारथीको दर्ज्यानी चिह्न प्रदान गर्नुभएको हो ।
नेपाल र भारतबीच दुवै देशका सेना प्रमुखहरुलाई कदरस्वरुप सन् १९५० देखि मानार्थ महारथी दिने ऐतिहासिक चलन रही आएको छ ।
प्रधानसेनापति क्षत्रीले आजै रात्रिभोजको आयोजना गर्ने कार्यक्रम रहेको सैनिक जनसम्पर्क निर्देशनालयले जनाएको छ ।
भारतीय सेनाको विभिन्न कमाण्डको भ्रमण गर्ने कार्यक्रमअन्तर्गत प्रधानसेनापति क्षत्रीले भोलि मध्य प्रदेशको इन्दौरस्थित आर्मी वार कलेजको भ्रमण गर्नुहुनेछ ।
