बिहीबार, माघ ८ २०७७ | Thu, January 21, 2021
नेपालको समय: ०२:३९ | UK Time: 20:54

सधँै ‘च्याम्पियन’ भएर सम्मान गर्ने मौका दिनुहोस् ः ओली

वीनेपाली
२०७२ माघ १४ गते १०:५९
प्रधानमन्त्री निवास वालुवाटारमा प्रधानमन्त्री केपी शर्मा ओलीद्वारा बङ्गबन्धु गोल्डकप उपाधि विजेता नेपाली राष्ट्रिय फुटबल टीमका खेलाडीलाई बिहीबार सम्मान गरेपछि सामूहिकरुपमा । तस्बिर ः प्रदीपराज वन्त, रासस

प्रधानमन्त्री निवास वालुवाटारमा प्रधानमन्त्री केपी शर्मा ओलीद्वारा बङ्गबन्धु गोल्डकप उपाधि विजेता नेपाली राष्ट्रिय फुटबल टीमका खेलाडीलाई बिहीबार सम्मान गरेपछि सामूहिकरुपमा । तस्बिर ः प्रदीपराज वन्त, रासस

काठमाडौँ, १४ माघ । प्रधानमन्त्री केपी शर्मा ओलीले फुटबल खेलाडीलाई सधँै ‘च्याम्पियन’ भएर सम्मानका लागि आफूलाई मौका दिन आग्रह गर्नुभएको छ ।

बङ्गलादेशमा भर्खरै सम्पन्न बङ्गबन्धु गोल्डकपको उपाधि विजेता नेपाली राष्ट्रिय फुटबल टोलीलाई आज प्रधानमन्त्री निवास बालुवाटारमा सम्मान गर्दै उहाँले टोलीका खेलाडीलाई प्रतिप्रश्न गर्दै भन्नुभयो, “तपाइँहरुलाई यसरी नै सम्मान गरिरहन पाउँ, सधँै जितेर मौका दिनुहुन्छ हैन ?”

प्रधानमन्त्री ओलीले २३ वर्षको अन्तरालपछि नेपाली टोलीले उपाधि जिताएर यसअघि लागेका खेल मिलेमतो (म्याच फिक्सिङ) लगायतका लज्जा बिर्साउँदै सम्पूर्ण फुटबललाई नै माथि उठाएको बताउनुभयो ।

युवा फुटबल खेलाडीमा जितको भोक चढिसकेकाले आसन्न दक्षिण एसियाली खेलकुद (साग)को फुटबलमा पनि टोलीले स्वर्णपदक जित्नमा आफू पूर्ण विश्वस्त रहेको बताउनुभएका उहाँले भन्नुभयो, “खेलमा जित्नैपर्छ, त्यसमा पनि नेपालले जित्नैपर्छ, त्यसैले सागमा स्वर्ण पदकको ट्रफी उचालेर आउनुहोस्, तपाइँहरुबाट देश र जनताले त्यही नै आशा गरेको छ ।”

प्रधानमन्त्री ओलीले नेपाली हावापानी, परिवेश र उकाली–ओराली प्राकृतिक रुपमै जित्नका लागि योग्य रहेको बताउँदै भन्नुभयो, “त्यसमा सीप, दक्षता र अनुशासन मिसाउनुहोस् ।” साथै, उहाँले ‘च्याम्पियन’ टोलीका सदस्यलाई जनही रु दुई दुई लाख दिन राष्ट्रिय खेलकुद परिषद् (राखेप) ले सरकारलाई गरेको सिफारिस कार्यान्वयन गर्ने प्रतिबद्धता व्यक्त गर्नुभयो ।

कार्यक्रममा युवा तथा खेलकुदमन्त्री सत्यनारायण मण्डलले आर्थिक कारणले कतिपय खेलाडीको खेल र पारिवारिक जीवन कष्टपूर्ण रहेकाले आफू सुधारका लागि लागिपरेको बताउनुभयो ।

सो अवसरमा प्रधानमन्त्री ओलीले ‘च्याम्पियन टोली’का खेलाडी तथा पदाधिकारीलाई दिवाभोजको आयोजना गर्नुभएको थियो ।

प्रतिक्रिया

सम्बन्धित सामाग्री

फेसबुक