बेपत्ता खोजबिन नियमावली एक हप्ताभित्र बन्ने प्रधानमन्त्रीको आश्वासन

काठमाडौँ, ७ पुस । बेपत्ता परिवार खोजबिनसम्बन्धी नियमावली तत्काल तयार पार्न बेपत्ता परिवार खोजबिन आयोगले सरकारसँग आग्रह गरेको छ ।

आयोगका पदाधिकारीले आज प्रधानमन्त्री केपी शर्मा ओलीलाई प्रधानमन्त्री कार्यालयमा भेटेर तत्काल नियमावली तयार पार्न आग्रह गरेको हो ।

आयोगका अध्यक्ष लोकेन्द्र मल्लिकले आफूहरूको आग्रहप्रति प्रधानमन्त्री निकै सकारात्मक पाएको जानकारी दिए । उनले एक हप्ताभित्रमा नियमावली पारित गरिसक्ने आश्वासन प्रधानमन्त्रीले दिनुभएको पनि बताए । झन्डै १० महिना अगाडि गठन भएको पाँच सदस्यीय आयोगले नियमावलीको मस्यौदा पाँच महिनाअघि नै तयार पारेर सरकारलाई बुझाइसकेको छ ।

भेटका अवसरमा प्रधानमन्त्री ओलीले शान्ति प्रक्रियाको अन्तिम कडीका रूपमा रहेका बेपत्ता परिवार छानबिन आयोग र सत्य निरुपण तथा मेलमिलाप आयोगले विगतको सशस्त्र द्वन्द्वका असरलाई समाजबाट समाप्त पार्ने गरी काम गर्नुपर्नेमा जोड दिएका थिए । पीडितले न्याय पाउन सक्ने गरी काम गर्न पनि आयोगलाई प्रधानमन्त्री ओलीले आग्रह गरेका थिए ।

आयोग गठन भएदेखि अहिलेसम्म आयोगको आचारसंहिता बनाउने, आयोगको नियमावलीको मस्यौदा बनाउने, कार्यालय स्थापना गर्नेलगायतका आन्तरिक काम गरेर बेपत्ताको खोजबिनका लागि स्थलगत भ्रमणमा जाने तयारीमा रहेको आयोगका अध्यक्ष मल्लिकले जानकारी दिए ।

उनले आयोगका लागि पर्याप्त स्रोत साधनको अभाव रहेकोतर्फ पनि प्रधानमन्त्री ओलीको ध्यानाकर्षण गराइएको बताए । प्रधानमन्त्री ओलीलाई भेट्न आयोगका अध्यक्ष मल्लिकसहित चार जना सदस्य र आयोगका सचिव पनि गएका थिए ।