वेट्रेसबाट सञ्चालक बनेकी आंटिली उद्यमी सरस्वती

लन्डन । गृहिणी भएपछि चुलो चौकामै सिमित रहनुपर्ने वाध्यता नेपालतिर अझै छ । छोरी भएर विदेश जानु सहज हुने कुरै भएन, त्यो पनि डेढ दशक अघि । तर, बाग्लुङकी सरस्वती केसीले नेपालको सामाजिक मानसिकता तोडेर जीवनमा केही गर्ने अठोट लिई बेलायत उत्रिइन् सन् २००३ मा ।

शुरुमै अन्य आमनेपाली जस्तै उनले पनि काम थालिन् रेष्टुरेन्टमा । महिलालाई कम चुनौती थिएन् वेट्रेस हुन । राती अबेरसम्म जागिर, ग्राहकको सोच्ने मनस्थिति अनि पारिवारिक वन्धन । विभिन्न व्यवधान बावजुद दशक बढि समय वेट्रेस भएर काम गरेकी सरस्वतीको परिचय अहिले बदलिएको छ । अत्यधिक व्यस्त रहने भेन्यू फाइभमा संगालेको कामको अनुभवपछि अहिले चल्तीकै भाषामा भन्दा उनी ‘मालिक्नी’ भएकी छिन् । सरस्वतीले दुई महिनाअघि देखि नर्थ ह्यारोमा सरस रेष्टुरेन्ट एण्ड बार सञ्चालन गरेकी हुन् । ‘सधैं जागिरे बन्नु भन्दा आफ्नो सीप र अनुभवले आफैं केही गरौं भन्ने सोचेर यो व्यवसायमा हात हालें’, आइतबार व्यस्तताबीच उनले सुनाइन्, ‘हो, रेष्टुरेन्ट व्यवसायमा अहिले धेरै प्रतिष्पर्धा छ । तर, यही चुनौती सामना गरेर केही पृथक काम गरौं भन्ने जोसले कस्सिएकी छु ।’
पर्याप्त जनशक्ति अभाव र बेलायत सरकारको कडा नियमले यो व्यवसायमा धेरै चुनौती आइपरेको अनुभव सरस्वतीको छ । तर, उनले हरेस खाएकी छैनन् । पति मिलन केसीको साथले पनि यस व्यवसायमा केही गरौं भन्ने दृढता उनको रहेछ ।

इन्डियन, नेपाली र इन्डो चाइनिज खानाका करिब एकसय आइटम सरस रेष्टुरेन्टमा उपलव्ध छन् । अनुभवी सेफले बनाउने स्वादिष्ट खाना, सभा समारोह वा संघसंस्थाका जुनसुकै बैठक गर्नुपरे पर्याप्त स्थान र पार्किङ व्यवस्था, पारिवारिक वातावरण, कर्मचारीहरुको न्यायो आतिथ्य र सहुलियत दर रेष्टुरेन्टका विशेषता रहेको केसीले 
जनाइन् । रेष्टुरेन्टको सिट क्षमता ७५ छ ।

सोमबारबाहेक सातामा ६ दिन खुल्ने उक्त रेष्टुरेन्टमा अर्डर कलेक्सनमा १५ प्रतिशतसम्म डिस्काउन्टको व्यवस्था छ ।

रेष्टुरेन्टले न्यू इयर इभमा डिजे डान्स एण्ड डिनर कार्यक्रम राखेको छ । सांझ ८ देखि राती एकबजेसम्म चल्ने उक्त कार्यक्रममा सहभागी भएर भरपुर मनोरन्जन लिन सरस्वतीले आग्रह गरेकी छिन् ।