एक्सेस फाइनान्सियल सर्भिसेजको चौंथो वार्षिकोत्सव

लन्डन । एक्सेस फाइनान्सियल सर्भिसेज यूकेले गत शनिवार चौंथो वार्षिकोत्सवसहित क्रिसमस जमघट गरेको छ । वेम्लीस्थित वेम्ली तन्दुरी रेष्टुरेन्टमा आयोजित कार्यक्रममा विभिन्न क्षेत्रका पेशेवर, ग्राहक, शुभचिन्तक र कम्पनी आवद्ध कर्मचारीहरुको उपस्थिति थियो । एक्सेसको चौंथो वार्षिकोत्सव, क्रिसमस र नयांवर्षका अवसरमा आयोजित उक्त कार्यक्रम अन्तरक्रिया, आपसी चिनजान र मनोरन्जनका लागि तय गरिएको हो ।

कार्यक्रममा एक्सेस फाइनान्सियल सर्भिसेज यूकेका इन्डिपेन्डेन्ट फाइनान्सियल एड्भाइजर मिन दर्लामीले सहभागीलाई स्वागत र शुभकामना दिंदै आफ्नो कम्पनीको उद्देश्य व्यवसायिक लाभ भन्दा पनि सामाजिक भावनाले ओतप्रोत भएको बताए । कार्यक्रममा उक्त सर्भिसेजका रमेशसिंह सराङकोटी र कुमार गुरुङ पनि सहभागी थिए ।

मोर्गेज, पेन्सन, स्टेट प्लानिङ, इन्भेस्टमेन्ट आदि क्षेत्रमा सेवा दिंदै आएको एक्सेसले केही साताअघिमात्र बेलायतको नेपाली समुदायलाई लक्षित गर्दै मोर्गेज, इन्स्योरेन्स, कर लगायत महत्वपूर्ण विषयमा सम्वन्धित क्षेत्रका वीज्ञहरुबाट निशुल्क परामर्श दिएको थियो ।

परामर्शमा कर बारे एसएनपी प्लसका ट्याक्स कन्सल्ट्याण्ट समिरनाथ प्याकुरेल, विलका बारेमा सन्दीप एन शाह, कन्भेयान्सिङबारे सोलिसिटर हितेश बी शाह, मोर्गेजका बारेमा मीन दर्लामी र बिज्नेस म्यानेजमेण्टका बारेमा एन्थोनी मुण्डेले परामर्श दिएका थिए ।

उक्त कम्पनीले परामर्श कार्यक्रम प्रभावकारी बन्दै गएको निष्कर्षसहित सन् २०१६ भित्र नेपाली अत्यधिक रहेका अरु ६ स्थानमा यस्तै कार्यक्रम गर्ने भएको छ । तस्विरहरुः एभरेष्ट गौतम