लन्डन । धरान समाज यूकेले क्रिसमस पार्टीलाई नै च्यारिटीमा केन्द्रित गरेर सामाजिक अग्रसरतामा एउटा नौलो प्रयोग गरेको छ । आइतबार ह्यारो बरो फुटबल क्लवमा आयोजित समाजको क्रिसमस पार्टी केवल खानपिनमा मात्र सिमित रहेन । पार्टीलाई नै च्यारिटीमा परिणत गरेर समाजले संकलित रकम धरान भानुचोकमा स्काइ ब्रीज (आकाशे पुल) निर्माणमा खर्चने अध्यक्ष उमेशराज मोक्तानले जनाएका छन् । ‘अहिले यति धेरै च्यारिटी हुन थाले कि मानिसहरु पैसा दिंदा दिंदा आजित भइसके । त्यसकारण पैसा मात्र माग्नुभन्दा क्रिसमस पार्टी गरेर दाताहरुलाई मनोरन्जन दिने मनसायले कार्यक्रम गरिएको हो’, मोक्तानले भने ।
करिब ५० लाख रुपैयांको लागतमा आकाशे पुल बनाइने जनाउंदै अध्यक्ष मोक्तानले हालसम्म विभिन्न माध्यमबाट आधाजसो रकम संकलित भइसकेको जनाए ।
शशी थापा सुब्बा र लक्ष्मी राई (लारा) ले सञ्चालन गरेको उक्त कार्यक्रममा क्रिसमस गीत, नाच र डिजे डान्स भएको थियो । टर्कीकी एक युवतीले गरेको बेली डान्समा पनि सहभागी रमाए । राफल चिट्ठामा लन्डन नेपाल न्यूजकी जेनी भट्टराईले पहिलो पुरस्कार न्यू बराह ज्वेलरीको तारा गुरुङको प्रायोजनमा दिइएको गोल्डेन डायमन्ड रिङ जितेकी छन् ।
उक्त अवसरमा दिइएको वेष्ट ड्रेस अन क्रिसमस थिमको पुरस्कार पुरुषमा रोजर विलियसले जिते भने महिलातर्फ सुष्मा गुरुङ र वालवालिकाको क्याटेगोरिजमा कन्चन तामाङ र मोनिका गुरुङले जिते ।
च्यारिटी स्वरुप कैलाश नेपाल, तमु समाज बेलायत, सुवसिंह गुरुङ, विरु तामाङ र देव गुरुङले जनही एकसय एक पाउण्ड सहयोग गरेका थिए । अध्यक्ष मोक्तानले पुरस्कार प्रायोजन र रकम प्रदान गर्ने दाता साथै सहभागीहरुलाई धन्यवाद दिएका छन् ।
उक्त कार्यक्रमको संयोजक थिइन् प्रसन्ना देवान राई । उक्त कार्यक्रममा हंग्री यतीका सञ्चालक माधवलाल श्रेष्ठले सहुलियत दरमा खाना उपलव्ध गराएका थिए ।
