लन्डन । आफ्नै वाध्यता र विवशता छन् ब्रिटिश लाहुरे पत्नीका । पल्टने जीवन । मनमा अनेक इच्छा आकांक्षा सांचेर पनि रचनात्मक काम गर्न कि त समय मिल्दैन् कि त पारिवारिक समर्थन । तर, रोमियन लिम्बुको हकमा भने माथिको कुरा खासै लागू भएन । उनको परिचय ब्रिटिश लाहुरे पत्नी भन्दा बढि फिल्मकर्मीका रुपमा स्थापित भएको छ ।
सन् २००७ यता बेलायतको ननिटन बस्दै आएकी रोमियन फिल्म निर्मात्री र नायिका दुवै हुन् । उनले आफ्नो प्रोडक्सन हाउस ‘चेली माइती इन्टरनेशनल फिल्मस्’ बाट दुई वर्ष अघि नागबेली फिल्म बनाइन् । नेपाल, हङकङ र यूकेमा प्रदर्शन भइसकेको उक्त फिल्ममा लाखौं पैसा खन्याउनुको उनको एउटै स्वार्थ थियो, फिल्मतिर सानै देखिको रुची र नेपाली फिल्म विदेशमा समेत प्रवर्धनका लागि । सन् २०१७ मा पनि एउटा फिल्म बनाउने योजना उनले बनाइसकेकी छिन् । रोमियनलाई फिल्मी नसाले छोइसकेको छ । बेला बेला उनी धेरैतिर हात त हालिएन भन्ने चिन्तामा समेत छिन् ।
करिब डेढ दशकअघि केही नेपाली फिल्ममा अभिनय गरेपनि उनी लाहुरे जीवनका कारण खुलेर बाहिर आउन सकेकी थिइनन् । तर, अब श्रीमान्को रिटायर्ड लाइफसंगै उनी यस क्षेत्रमा सक्रिय हुने तयारी गर्दैछिन् ।
हालै मात्र नेपाल गएर उनले ‘भूपू लाहुरे’ नामक फिल्ममा लिडिङ रोल गरेर यूके फर्किएकी हुन् । नेपाल गएका बेला गायक पदम राई र निर्देशक गोविन्द राईको म्यूजिक भिडियोमा समेत अभिनय गरिन् उनले ।
रोमियनको फिल्म कम्पनीले ल्याउने प्रकृति नामक एल्बमका लागि ६ वटा गीत रेकर्ड भइसकेको छ ।
झापा बिर्तामोडकी रोमियन बेलायतस्थित विभिन्न संघसंस्थामा आवद्ध छन् । उनी ब्रिटिश गोर्खा नेपलिज काउन्सिलको कलाकार विभाग संयोजक पनि हुन् । उनी अहिले ‘हट केक’ गायिका इन्दिरा जोशी लगायतका कलाकारको संलग्नतामा यूकेमा कार्यक्रम गर्ने तयारीमा जुटेकी छिन् ।
