पुनःनिर्माण प्राधिकरण गठन विषयले संसद् बैठक स्थगित

sambidhan sabha

काठमाडौँ, २५ मङ्सिर । व्यवस्थापिका–संसद्को आजको बैठक सूचना टाँस गरेर स्थगन भएको छ ।

आज अपराह्न ३ बजेका लागि तय भएको बैठकमा भूकम्पपछिको पुनःनिर्माण प्राधिकरण गठनसम्बन्धी विधेयक मात्रै पेस गर्ने कि संविधान संशोधनसम्बन्धी विधेयक पनि सँगै पेस गर्ने भन्ने विषयमा कुरा मिल्न नसक्दा बैठक बस्न नसकेको हो ।

व्यवस्थापिका–संसद् सचिवालयका प्रवक्ता डा भरतराज गौतमले यही मङ्सिर २७ गते अपराह्न ३ बजेसम्मका लागि बैठक स्थगन भएको जानकारी दिए । बैठक सञ्चालन गर्ने विषयमा सत्तारुढ, प्रमुख प्रतिपक्षी र मधेसकेन्द्रित दलका नेतासँग संसद् भवन नयाँ बानेश्वरमा नै छलफल भए पनि कुनै निष्कर्षमा पुग्न सकेन ।

नेपाली काँग्रेसका उपसभापति रामचन्द्र पौडेलले आइतबार बस्ने बैठकमा संविधान संशोधन विधेयक र भूकम्पपछिको पुनः निर्माण प्राधिकरण गठनसम्बन्धी दुवै प्रस्ताव पेस गर्ने गरी बैठक स्थगन भएको जानकारी दिए ।

प्रतिक्रिया

सम्बन्धित सामाग्री