लन्डन दूतावासले पुरानो पासपोर्ट बिनै एमआरपी दिने

लन्डन । लन्डनस्थित नेपाली दूतावासले पुरानो पासपोर्ट बिनै एमआरपी दिने भएको छ । होम अफिसमा ‘केस’ विचाराधिन भएर पुरानो पासपोर्ट उतै थन्किएका विद्यार्थीलाई यसबाट राहत मिल्ने छ ।

एउटा निवेदन दिएपछि दूतावासले एमआरपी उपलव्ध गराउने छ । तर, उसले होम अफिस, परराष्ट्र मन्त्रालय, इन्टरपोल लगायत अन्य निकायमा पुरानो पासपोर्ट रद्द गरिएको जनाउ दिंदै ‘नल एण्ड भ्वाइड’ भने गरिदिनेछ ।

उता, अन्तर्राष्ट्रिय नागरिक उड्ययन प्राधिकरणको नियम अनुसार,२४ नोभेम्बरपछि हस्त लिखित राहदानी अमान्य भइसकेको अवस्थामा  दूतावासले एमआरपी बनाइ नसकेका नेपाली राहदानीवहाकलाई ६ देखि ९ महिनासम्मको अस्थायी राहदानी बनाइदिने भएको छ । कार्यवहाक राजदूत तेजबहादुर क्षेत्रीले एमआरपी नबनाइन्जेलसम्मका लागि अस्थायी राहदानी बनाउने व्यवस्था गरिएको जनाए । यसबाट आकस्मिक यात्रा, हस्पिटलतिर, लाइसेन्स बनाउन वा अन्य अत्यावश्यक काममा उपयोग गर्न सहज हुनेछ ।

क्षेत्रीले एमआरपी बनेर आइसकेपनि दूतावासबाट धेरैले संकलन नगरेको बताए । ‘कतिपयले वेवास्ता गरिरहेको पाइएको छ । बेलैमा संकलन गर्न नआए फेरि नेपाल फिर्ता पठाउन हामी वाध्य हुनेछौं । त्यसकारण यसमा ढिलाइ नगर्न मेरो आग्रह छ’, क्षेत्रीले भने ।