काठमाडौँ, ११ मङ्सिर । भारतीय पक्षबाट भएको अघोषित नाकाबन्दी र देशमा देखिएको समस्याका विषयमा उपप्रधानमन्त्री तथा परराष्ट्रमन्त्री कमल थापाले पूर्व परराष्ट्रमन्त्री, पूर्व परराष्ट्र सचिव, पूर्व राजदूत र विभिन्न पार्टीका विदेश विभाग हेर्ने प्रतिनिधिहरुसँग सामूहिक छलफल गरेका छन् ।
परराष्ट्रका प्रवक्ता ताराप्रसाद पोखरेलले अहिले देखिएको असहज परिस्थितिको समाधानका उपायबारे परराष्ट्र जानकारसँग राय सुझाव माग्न आज छलफल कार्यक्रमको आयोजना गरिएको जानकारी दिए ।
उनले छलफलमा विभिन्न कोणबाट सुझाव आएको जानकारी दिँदै भारतसँग कूटनीतिक, राजनीतिकलगायत आवश्यक विभिन्न माध्यमबाट समस्या समाधानका लागि पहल गर्नुपर्नेमा सहभागीले जोड दिएको बताए ।
सहभागीले नाकाबन्दीको आडमा भारतले नेपालमाथि आफ्नो चाहना लाद्न खोजेको बताउँदै त्यसमा सरकार सचेत हुनुपर्ने सुझाव दिएका थिए ।
छलफलका सहभागीले मधेस आन्दोलनको माग समाधानका लागि निष्कर्ष निस्कने गरी ठोस वार्ता गर्नुपर्नेसमेत सुझाव दिएका थिए ।
प्रवक्ता पोखरेलले भारतले गरेको नाकाबन्दी आफँै अन्तर्राष्ट्रिकरण भइसकेको बताउँदै त्यसबारे विश्व समुदाय जानकार भइसकेको बताए ।
