नाकाबन्दीका कारण औषधि नाकामै रहंदा नेपालमा औषधिको अभाव भएको छ ।
लन्डन । बेलायतका नेपाली चिकित्सकहरुको संगठन ‘दि नेपलिज डक्टर्स एसोसिएसन’ (एनडिए) यूकेले भारतको अघोषित नाकाबन्दी खुलाउन अन्तर्राष्ट्रिय समुदायसंग अपिल गरेको छ । एसोसिएसनले एक विज्ञप्तिमार्फत नाकाबन्दी अन्त्य गर्दै औषधि लगायत नेपाली जनताका अत्यावश्यक स्वास्थ्य सेवाहरुको पहुंचका लागि पहल गरिदिन आग्रह गरेको हो ।
एसोसिएसनले नाकाबन्दीका कारण नेपालमा इन्धन, खाद्यान्न र औषधि अभावले विकराल अवस्था आएको उल्लेख गर्दै यसप्रति गम्भीर चिन्ता व्यक्त गरेको छ । यस्तै गम्भीर अवस्था कायमै रहे मानवीय संकट झन् गहिरिने औंल्याउंदै संगठनले यूनिसेफ, अन्तर्राष्ट्रिय रेडक्रस र विश्व स्वास्थ्य संगठन (हु) लाई सहयोग गर्न पनि आग्रह गरेको छ ।
स्मरण रहोस्, दुई महिनादेखि जारी नाकाबन्दीका कारण औषधिका कच्चा पदार्थलगायत विभिन्न औषधि नाकामै रहेका कारण नेपालमा औषधिको अभाव भएको छ ।
धेरै अस्पतालहरु सुचारु हुन सक्ने अवस्थामा नरहेका र सर्वसाधारणहरु इन्धन अभावका कारण एम्बुलेन्स् चल्न नसक्दा मर्कामा परेको तथ्य स्मरण गर्दै एसोसिएसनले वर्तमान अवस्थाले स साना वालवालिका, सुत्केरी महिला र वृद्धवृद्धा अझ बढि प्रभावित भएका जनाएको छ ।
खोप अभाव र भण्डारणको उचित व्यवस्था हुन नसक्दा वालवालिकालाई खोप कार्यक्रम सञ्चालन गर्न नसकिएकोमा समेत एसोसिएसनले चिन्ता व्यक्त गरेको छ । निर्मुल भइसकेका रोग समेत पुनः देखिने चिन्ता पनि एसोसिएसनलाई छ ।
यसैबीच, अधिकांश औषधि वीरगन्ज नाकामा अड्किएकाले त्यसलाई रानी र सुनौली भन्सार नाकाबाट नेपाल ल्याउने तयारी भइरहेको औषधि व्यवस्था सहजताका लागि बनेको सरकारी कार्यदलले जनाएको छ ।
