कोसेलीले लन्डनमा खेल्यो देउसी भैलो

 

लन्डन । बेलायतको पुरानो संस्था कोसेली नेपाली सांस्कृतिक परिवार यूकेले यस वर्ष पनि तिहारका अवसरमा लन्डनमा सामूहिक देउसी भैलो कार्यक्रम गरेको छ ।

लक्ष्मी पूजा र भोलिपल्ट गरि दुई दिन देउसी भैलो कार्यक्रम गरिएको कार्यक्रम संयोजक एवं संस्थाकी ट्रष्टी तथा पूर्व महासचिव शर्मिला सिंहले जनाइन् । संयोजक सिंहले नेपाली परम्परा र संस्कृतिको निरन्तरता एवं कोसेलीकै कोषवृद्धिका लागि देउसी भैलो खेलिएको बताइन् ।

बिहीबार ब्लु अर्किडमा सामूहिक देउसी भैलो खेलियो जसमा ६० जना भन्दा बढि सहभागी थिए ।

विशुद्ध परम्परागत नेपाली बाजागाजासहित पुगेको कोसेलीको समूहले शुरुमा भट्याउने कार्यक्रमपछि गायन र नाच गरि माहोल रोमाञ्चक बनाएको 
थियो । देउसी भैलोले नेपालकै झझल्को दिएको सहभागीले बताए ।

कार्यक्रममा उज्जवल श्रेष्ठले संगीत संयोजन गरेका थिए भने कोसेलीका संस्थापक अध्यक्ष मदन थापाले टिपिकल बाजा मादल र सारंगीमा साथ दिएका थिए ।

देउसी भैलो कार्यक्रममा संस्थापक अध्यक्ष मदन थापा, कलाकारहरु शर्मिला सिंह, खेम गौतम, निश्चल दाहाल, पूर्ण बज्राचार्य लगायतले गीत गाउनुका साथै वाद्यवादनको भूमिका निर्वाह गरेका थिए । 


तस्विरहरु सौजन्यः सुशील सिंह, नेपाली समाज यूकेडटकम