बेलायतकी नेपाली नर्स रुल दि रनवे यूके मोडलिङ प्रतियोगितामा छनोट

लन्डन । बेलायतकी एकजना नेपाली नर्स प्रसुना कंडेल रुल दि रनवे यूके मोडलिङ प्रतियोगितामा छानिएकी छन् ।
तीन अडिसन पार गरेर उनी अन्य २४ जनासहित आगामी फेब्रुअरी २०१६ मा यूकेको बर्मिङ्ममा हुने प्रतियोगिताका लागि छानिएकी हुन् ।

रुल दि रनवे यूकेले संसारभरका मोडल तथा डिजाइनरहरुका लागि प्लेटफार्म प्रदान गर्ने गर्छ ।

यतिखेर उक्त प्रतियोगिताका लागि फेसबुक तथा ट्वीटरमार्फत अनलाइन भोटिङ शुरु भइरहेकाले प्रतिष्पर्धी कंडेलले आफूलाई भोट गरिदिन आग्रह गरेकी छिन् । आगामी जनवरी ४ सम्म एउटा व्यक्तिले प्रत्येक दिन भोट गर्न सक्ने कंडेलले जनाइन् । विभिन्न आइपीबाट पनि भोट गर्न सकिनेछ । आफ्नो लिंकलाई सामाजिक सञ्जालमा सकेसम्म शेयर गरेर सहयोग गरिदिन उनको अपिल छ । प्रतियोगितामा उपाधि जिते त्यसले नेपाल र नेपालीकै चिनारी हुने विश्वास प्रसुनाले व्यक्त गरेकी छिन् ।

पेशाले नर्स उनी नेपलिज नर्सिङ एसोसिएसन यूकेकी उपाध्यक्ष हुन् । तर, पछिल्लो समय समाजसेवामा उनको संलग्नता बढेर गएको छ । भूकम्प लगत्तै उनकै संयोजनमा नेपाली नर्सहरुको टोली सिन्धुपाल्चोक, धादिङ, काभ्रे, रसुवा, लगायत १० जिल्ला पुगेर राहत वितरण तथा उपचारमा संलग्न भएको थियो । उनले धादिङ मारपाक गाउंका एक भूकम्प पीडित ९ वर्षीय बालकको जीवनभरको अध्ययन तथा खर्चको जिम्मेवारी लिएकी छिन् । नेप्लिज वुमेन एसोसिएसन यूके र नेप्लिज ब्लड डोनर यूकेमा महासचिवको जिम्मेवारी लिइरहेकी उनी केही समयअघिमात्र बेलायतको एउटा अनलाइन पोर्टलको छनोटमा टप टेन भित्र परेकी थिइन् ।

उनले यसअघि पनि बेलायतका विभिन्न मोडलिङ प्रतियोगितामा सहभागिता जनाइसकेकी छिन् । गत वर्ष आयोजित अन्तर्राष्ट्रिय एफ्रो मोडल अवार्ड देखि सन् २०१२ मा सम्पन्न फेस अफ प्यूरिटीको फाइनलिष्टमा छनोट भएर मिस पब्लिक च्वाइस अवार्ड समेत हासिल गरिसकेकी छिन् उनले । यूकेका विभिन्न वेवसाइट तथा म्यागजिनका लागि फोटोसुट गरिरहने उनले बेलायतमा निर्मित नेपाली चलचित्र यू टर्नमा सह नायिकाको भूमिका समेत गरेकी थिइन् । प्रसुना यतिखेर किङडम स्कुल अफ आर्ट्समा थिएटर तथा एक्टिङमा डिप्लो कोर्स गरिरहेकी छन् ।

भोटिङका लागि तलको लिंकमा जानुहोस् 

https://www.facebook.com/RuletheRunwayUK/?sk=app_451684954848385&brandloc=DISABLE&app_data=view-vote%2Cfor-11248943&__mref=message