लन्डन । भारतले नेपालमा लगाइरहेको अघोषित नाकाबन्दी विरुद्ध विश्वभरका हाइ कमिसनमा ज्ञापनपत्र बुझाउने कार्यक्रम अन्तिम समयमा आएर एक्कासी स्थगित भएको छ । गैर आवासीय नेपाली संघ (एनआरएनए) अन्तर्राष्ट्रिय समन्वय परिषदले आज मंगलबार एकै दिन एनआरएनए राष्टिय समिति बनेका विश्वका ७१ वटै मुलुकका भारतीय हाइ कमिसनमा ज्ञापनपत्र बुझाउने कार्यक्रम राखेको थियो ।
तर, एनआरएनए आइसीसीले एक दिन अघि सोमबारमात्र विशेष कारण देखाउंदै ज्ञापन बुझाउने कार्यक्रम स्थगित गर्नुपरेको जनाएको छ । यद्यपि, के कति कारणले कार्यक्रम रोक्नु परेको हो त्यो भने स्पष्ट पारिएको छैन् ।
कार्यक्रम एकाएक स्थगित हुनुलाई कतिपयले राजनीतिक प्रभावसंग पनि जोडेर हेरेका छन् । भारतले नाकाबन्दी खुकुलो पार्ने संकेत गरेको अनौपचारिक समाचार आइरहंदा कार्यक्रम स्थगित भएको हो ।
गैर आवासीय नेपाली संघ, बेलायतले सोमबार अबेर इमेलमार्फत लन्डनस्थित अल्बीचमा रहेको भारतीय हाइकमिसनमा ज्ञापनपत्र बुझाउने कार्यक्रम रोकिएको जनाएको छ । एनआरएनए यूके महासचिव विजय विक्रम लिङ्देनले कार्यक्रम रोकिनुको कारण आफूहरुलाई स्पष्ट नभएको जनाए । ‘खोइ कसैको दवावमा रोकिनु परेको भन्नेबारे त थाहा भएन’, उनले वीनेपालीसंग सोमबारसांझ भने ।
एनआरएनए यूकेका अध्यक्ष मुछेत्र गुरुङले यसबाट पर्न गएको असुविधाप्रति दुःख व्यक्त गरेका छन् । उनले ज्ञापनपत्र बुझाउने कार्यक्रम स्थगित भएपनि १२ नोभेम्बर बिहीबारको भारतीय प्रधानमन्त्री नरेन्द्र मोदीविरुद्ध प्रदर्शनको कार्यक्रम भने सफल पार्न सबैमा आग्रह गरेका छन् । विरोध प्रदर्शन १२ नोभेम्बर मध्यान्ह १२ बजेदेखि बेलायती संसद भवन अगाडि हुंदैछ । उक्त प्रदर्शनमा बेलायतस्थित तीन दर्जन भन्दा संघसंस्थाका प्रतिनिधि र अन्य हजारौं नेपाली स्वतस्फूर्त सहभागी हुने अपेक्षा गरिएको छ ।
