लन्डन । बेलायतस्थित हिमालय मेल लिमिटेडले “हिमालय मेल” साप्ताहिक पत्रिका प्रकाशन गर्ने भएको छ । आउंदो डिसेम्बर पहिलो साताबाट पत्रिका प्रकाशन आरम्भ हुने र अनलाईन न्यूज पोर्टलको परिक्षण प्रसारण यहि नोभेम्बर ११ तारिख बुधबार लक्ष्मीपूजाको दिनदेखि सुरु हुने पत्रिकाका प्रधानसम्पादक ध्रुवराज अर्यालले जनाए ।

नेपालमा केही वर्ष टेलिभिजन पत्रकारिता गरेर सन् २००९ मा यूके आएका अर्यालसंग डेढ वर्ष युरोपको नेपालीपत्रमा सम्पादक र विगत ६ वर्षदेखि नेपाली टिभीमा काम गरिरहेको अनुभव छ ।

बेलायतमा यसअघि खुलेका कयौं नेपाली मिडिया टिक्न नसकेर बन्द भएकाबारे आफूहरु सचेत भएको उल्लेख गर्दै अर्यालले चुनौतीबीच पनि कयौं सम्भावनाहरु पहिचान गरिएको बताए ।

“बेलायतको नेपाली समुदायमा एक विश्वसनीय, निस्पक्ष तथा व्यवसायिक मिडियाका रुपमा स्थापित हुनु हाम्रो लक्ष्य हो । नेपाल तथा बेलायतमा राष्ट्रिय स्तरका पत्रपत्रिका, टेलिभिजन तथा अनलाईन मिडियाहरुमा सम्पादकीय भूमिकामै समेत अनुभव लिएका पत्रकारहरुसहितको जुझारु टिम हामीसंग छ”, अर्यालले भने ।

बेलायतको नेपाली समुदायको सरोकारका हरेक विषयमा सकेसम्म चांडो र विश्वसनीय रुपमा सत्य, निश्पक्ष र सन्तुलित समाचार सम्प्रेषण गर्नु आफ्नो प्रतिज्ञा भएको अर्यालले बताएका छन् ।