तस्विर शर्माको फेसबुकबाट
लन्डन । एउटा फर्जी पत्र काण्डमा नेपाल पत्रकार महासंघ, बेलायत शाखा अध्यक्ष एवं नागरिक दैनिकका लागि लन्डनस्थित संवाददाता चिरन शर्माको संलग्नता रहेको छानवीन प्रतिवेदनले निष्कर्ष निकालेको छ । अध्यक्ष शर्माकै निर्देशनमा शाखाका महासचिव श्याम लुईंटेलले गरेको छानवीन प्रतिवेदनले शर्माको संलग्नता पुष्टि गर्दै नैतिकताको आधारमा तत्काल राजिनामा दिएर संस्थाको साख जोगाउन सुझाव दिएको छ ।
‘फर्जी पत्र प्रकरणमा नेपाल पत्रकार महासंघ बेलायत र यसका अध्यक्ष मुछिनुभएकाले संस्थाको साख जोगाउन कार्यसमिति र शाखाका सदस्यहरुले आवश्यक कदम लिन अपरिहार्य देखिन्छ । कार्यसमितिको बैठक चांडोभन्दा चांडो डाकी यसबारेमा निर्णय लिन सुझाव दिन्छु । साथै अध्यक्ष शर्माले आफूमाथि लगाइएको आरोप यदि निराधार हो भने सोको प्रमाण तत्काल पेश गर्नुपर्नेछ । अन्यथा छानवीनलाई व्यापक बनाइ सहयोग गर्न र संस्थाको गरिमा, प्रतिष्ठा र मर्यादा गुम्न नदिन पदबाट तत्काल राजिनामा दिनुपर्दछ’, प्रतिवेदनले भनेको छ ।
नेपाली कांग्रेस केन्द्रीय कार्यालयबाट नेपाली जनसम्पर्क समिति, बेलायतका नाममा पठाइएको पत्र ‘फर्जी’ भएको र त्यसमा अध्यक्ष शर्माको प्रत्यक्ष संलग्नता रहेको समाचार प्रकाशित भएपछि यस सम्वन्धमा छानवीन शुरु भएको थियो । शर्माले लन्डनस्थित आफ्नो वेवसाइट नेपाल ब्रिटेन डटकमको इमेलबाट फर्जी पत्र पठाएको दावीसहित नेपाली जनसम्पर्क समिति, बेलायतको बैठकमै उनीविरुद्ध कारवाही अगाडि बढाउने निर्णय भएको थियो ।
औपचारिक नगरि कार्यसमितिमाझ मात्र बांडिएको प्रतिवेदनमा नेपाली कांग्रेस केन्द्रीय समन्वय विभाग सदस्य विज्ञान प्रसाईंको भिडियो, हस्तलिखित समाचार, महामन्त्री शिव तिमिल्सिना र उपाध्यक्ष युवराज गुरुङसितको अडियो रेकर्ड, विभिन्न समयमा आदानप्रदान गरिएका इमेलहरुबाट अध्यक्ष शर्मा फर्जी पत्र प्रकरणमा जानकार र संलग्नता पुष्टि रहेको दावी गरिएको छ । प्रसाईंले भिडियो र अन्य समाचारहरुमा नामै तोकेर अध्यक्ष शर्मामाथि कीर्ते पत्र बनाएको संगीन आरोप लगाउंदा समेत शर्माले खण्डन गर्ने हिम्मत नगर्नु र उल्टो प्रसाईंसंग मिल्ने कुरा गर्नुले उनको संलग्नता पुष्टी गर्न थप बल पुगेको प्रतिवेदनमा उल्लेख छ । शर्माले ‘म नेपाल ब्रिटेन डटकम वेवसाइटमा विगत ६ महिनादेखि संलग्न छैन्’ भनेपनि उक्त साइटको सञ्चालक समितिमा रहेकामध्ये एक समाजसेवी कुल आचार्यसंग टेलिफोनमा कुरा गर्दा ‘चिरन शर्माले नै नेपाल ब्रिटेन डट कममा काम गरिरहेको’ बताएको प्रतिवेदनमा उल्लेख छ ।
सानातिना असहमतिबीच पनि विवादरहित बनेको नेपाल पत्रकार महासंघ बेलायतमाथि अध्यक्ष शर्माकै गतिविधिका कारण पहिलोपटक सार्वजनिक रुपमा प्रश्न उठ्नु विडम्बनापूर्ण रहेको प्रतिवेदनमा छ ।
