आइतबार, मंसिर १२ २०७८ | Sun, November 28, 2021
नेपालको समय: ००:१२ | UK Time: 18:27

बेलायतका रोटरी क्लवले स्कुल पुनर्निर्माणमा सघाउने

वीनेपाली
२०७२ कार्तिक १९ गते २१:००
रोटरी क्लव अफ फिस्टेल पोखराका अध्यक्ष तेजबहादुर गुरुङ

रोटरी क्लव अफ फिस्टेल पोखराका अध्यक्ष तेजबहादुर गुरुङ

लन्डन । बेलायतका केही रोटरी क्लवले भूकम्पपछि क्षतिग्रस्त नेपालको स्कुल पुनर्निर्माणमा सघाउने प्रतिवद्धता व्यक्त गरेका छन् । रोटरी क्लव अफ फिस्टेल पोखराको निकट सम्वन्धमा रहेका बेलायतस्थित रोटरी क्लव अफ ड्रोनफिल्ड, रोटरी क्लव अफ ब्रिस्टोल, रोटरी क्लव अफ ब्रिस्टोल ब्रेकफाष्ट र रोटरी क्लव अफ क्रुक ह्याम्ब्रीजले पुनर्निर्माणमा आर्थिक सहयोग गर्ने प्रतिवद्धता जनाएका हुन् ।

रोटरी क्लव अफ फिस्टेल पोखराका अध्यक्ष तेजबहादुर गुरुङसहितको नेपाली प्रतिनिधिमण्डलसंगको भेटघाटमा रोटरी क्लव अफ ड्रोनफिल्डले रुपाकोट गाविसस्थित पृथ्वी रुपा माविमा ६ कोठे भवन र शौचालय बनाइदिने सम्झौता गरेको गुरुङले जनाए । उनका अनुसार, रोटरी क्लव अफ ब्रिस्टोलसंग मिलेर पसगाउं, भुजुङ र गिलुङका ५ वटा स्कुल पुनर्निर्माण गर्ने समझदारी भएको छ । माथि उल्लेखित अन्य बांकी क्लव पनि आर्थिक सहयोग जुटाउन राजी छन् ।

रोटरी क्लव अफ फिस्टेल पोखराले खानेपानी, स्वास्थ्य, छात्रवृति लगायतमा सहयोग जुटाउंदै आएको छ ।
यसैबीच, नेपाल ह्याण्डबल एसोसिएसनका अध्यक्ष समेत रहेका गुरुङ यही ६ देखि ९ नोभेम्बरसम्म रसियाको सोचीमा हुने ‘इन्टरनेशनल ह्याण्डबल फेडेरेसन’ को विशेष अधिवेशनमा भाग लिन यूकेबाट त्यसतर्फ प्रस्थान गरेका छन् । विश्वका २०० भन्दा बढि देशका ह्याण्डबल एसोसिएसन अध्यक्षहरुको सहभागिता रहने उक्त अधिवेशन विकासोन्मुख देशमा ह्याण्डबल खेल विकास कसरी गर्न सकिन्छ भन्नेमा केन्द्रित हुने जनाइएको छ ।

नेपालमा ह्याण्डबल खेल वि.स. ०४० देखि ०४७ सालसम्म निक्कै उचाईंमा थियो । तर, २०४६ को राजनीतिक परिवर्तनले समग्र खेल क्षेत्र उथलपुथल भएपछि विस्थापितको मारमा ह्याण्डबल पनि पर्यो । अहिले नेपाल ह्याण्डबल एसोसिएसनले उक्त खेल विद्यालयस्तर देखि नै उकास्ने प्रयास गरिरहेको गुरुङले जनाए । ‘सानो मैदानमा पनि खेल्न सकिने, सस्तो एवं नेपालीको शारिरीक अवस्था र नेपाल जस्तो पहाडी मुलुकमा गाउं गाउंमा विस्तार गर्न सकिने सम्भावना यस खेलको छ’, गुरुङले जनाऊ दिए, ‘ह्याण्डबल खेलमा नेपाल साउथ एसियामा सेमिफाइनलसम्म पुगेको स्थिति छ । महिलाले तेश्रो स्थान (मेडल) ल्याइसकेका छन् ।’

एसोसिएसनकै पहलमा नेपाल प्रहरी, आर्मी र सशस्त्र प्रहरी तिनै विभागमा ह्याण्डबल खेल्न शुरु भएको छ । प्रधानसेनापति कपमा ह्याण्डबल प्रवेश भएको छ भने विद्यालय स्तरमा यो खेल लैजाने तयारी भएको अध्यक्ष गुरुङले जनाए । एसियन हयाण्डबल फेडेरेसन र इन्टरनेशनल फेडेरेसनसंग राम्रो सम्वन्ध विस्तार गर्दै गएको एसोसिएसनले केही समय अघि स्पेन, फ्रेन्च र कोरियन कोच ल्याएर खेलाडीलाई प्रशिक्षण दिइसकेको छ ।

भूकम्पपछि मानसिक रुपमा सबैभन्दा प्रभावित भए वालवालिका । यो अवस्थालाई मध्यनजर राख्दै ह्याण्डबल एसोसिएसनले ‘ह्याण्डबल वीथ सेकन चिल्ड्रेन’ नारा नै दिएर विद्यालय स्तरको प्रतियोगिता गरेको थियो । अब यस्तो प्रतियोगिता ५ विकास क्षेत्रमै गरिने गुरुङले जनाए । ‘खेल मेडल जित्ने हिसावले बढाउनु पर्छ तर वालवालिकालाई मनोरन्जन र यसप्रति प्रेरित पनि गराउनुपर्छ भनेर हामीले अहिले त्यसमा प्राथमिकता दिइरहेका छौं’, गुरुङले भने ।

नेपाल ओलम्पिक कमिटीमा कार्यकारी सदस्य समेत रहेका गुरुङले नेपालमा एनआरएनले खेल विकास कसरी गर्न सक्छ भन्नेबारे प्रारम्भिक छलफल भइसकेको र अब छिट्टै एमओयू (सम्झौता) हुने गुरुङले जनाए ।

प्रतिक्रिया

सम्बन्धित सामाग्री

फेसबुक