लन्डन । शनिवारदेखि हराइरहेका फोटो पत्रकार हरिमान गुरुङ मृत भेटिएका छन् । बेलायतबाट प्रकाशित हुने एभरेष्ट टाइम्स् साप्ताहिकको अनलाइन संस्करणका लागि भिडियो तथा फोटो खिच्ने उनी हुक र बेजिङस्टोक बीचको झाडीमा सोमबार मृत अवस्थामा भेटिएको धम्पुस परिवार यूके महासचिव कुमार गुरुङले वी नेपालीलाई जनाए ।
‘हरिमान भाइको शव उनलाई खोज्न गएको टोलीले भेटेको खवर छ । उनी घुंडा टेकेको अवस्थामा रहेछन् । घांटीमा रसी भएपनि झुण्डिएको अवस्थामा थिएनन् । नजिक रुख पनि छैन् र हतियार पनि । शरीर मैदानमा लडेको रहेछ’, आश्चर्यजनक मृत्युबारे धम्पुस परिवार यूके महासचिव गुरुङले वीनेपालीसंग भने ।
शनिवार बेलायतको अल्डरसटस्थित एम्पायर हलमा वडा नम्बर ६ फिल्म हेरेर राती ९.४५ तिर हलबाट निस्किएका उनी त्यसयता सम्पर्कमा नआएपछि परिवारले आइतबार अल्डरसट प्रहरीमा उजुरी गरेको थियो ।
शव भेटिएपछि खोजीकर्ताले तत्काल प्रहरी र घर परिवारलाई खवर गरेका थिए । त्यसलगत्तै प्रहरीका तीनवटा गाडी गएर अनुसन्धान थालेको र पोष्टमोर्टमपछि मृत्युको वास्तविक कारण थाहा हुने जनाइएको छ । उनको गाडी हुक र बेजिङस्टोक जाने बाटोको जंगलमा भेटिएको थियो । गाडीभित्र क्यामेरा पनि थियो । गाडी पार्क भइरहेको ठाउंबाट एकसय मिटर पर शव फेला परेको समाचारमा उल्लेख छ ।
गुरुङको देहवसानले परिवार र साथीभाई चिन्तित छन् । सन् २००६ मा हङकङबाट यूके आएका कास्कीको धम्पुस निवासी हरिमान श्रीमति सुनिता गुरुङ र दुई छोरीका साथ अल्डरसट बस्दै आएका थिए । उनी ज्यादै मिजासिलो, सोझो, सहयोगी र आंखामा हाले पनि नबिजाउने खालको रहेको सहकर्मी फोटो पत्रकार मिलन तमुले वी नेपालीलाई जनाए । ‘शनिवार म काममा भएकाले तमु पेल्यू संघ यूकेको कार्यक्रमको फोटो खिच्न जानु है भनेको होइन आज म मेरो परिवारलाई समय दिन्छु भनेर गएनन्’, आंखाबाट आंसु झार्दै तमुले भने, ‘वकिङमा दशैं मान्न संगै गयौं, बडा नम्बर ६ फिल्म पनि संगै हेरेको साथी यस संसारबाट एक्कासी विदा भएको सुन्नुपर्दा विश्वास नै गर्न सकेको छैन् ।’
हरिमानको गीत संगीतप्रति रुची थियो । बेलायतमा हुने विभिन्न कार्यक्रममा गीत गाउने गरेका उनले लेखेका गीतहरुको संगालो ‘लाएको माया’ एल्बम बजारमा आइसकेको छ ।
