लन्डन । बेलायतबाट प्रकाशित हुने एभरेष्ट टाइम्स् साप्ताहिकको अनलाइन संस्करणका लागि भिडियो तथा फोटो खिच्ने पत्रकार हरिमान गुरुङ गत शनिवार
राती देखि सम्पर्कविहीन भएका छन् । शनिवार बेलायतको अल्डरसटस्थित एम्पायर हलमा वडा नम्बर ६ फिल्म हेरेर राती ९.४५ तिर हलबाट निस्किएका उनी त्यसयता सम्पर्कमा नआएपछि परिवारले आइतबार अल्डरसट प्रहरीमा उजुरी गरेको छ ।
उनको गाडी भने हुक र बेजिङस्टोक बीच पर्ने जंगलमा भेटिएको छ ।
गुरुङको अज्ञात अवस्थाले परिवार चिन्तित छ । उनी श्रीमति सुनिता गुरुङ र दुई छोरीका साथ अल्डरसट बस्दै आएका थिए । सन् २००६ मा हङकङबाट यूके आएका हरिमान ज्यादै मिजासिलो र कहिल्यै पेय पदार्थ नपिउने बानी भएको पत्रिकामै काम गर्ने सहकर्मी फोटो पत्रकार मिलन तमुले वी नेपालीलाई जनाए । प्रहरीमा उजुरी भएपछि अल्डरसट पुलिस र आफन्त एवं अन्य नेपालीले खोजी तीव्र पारेको मिलन तमुले जनाए ।
परिवारले उनीबारे केही जानकारी भए फोन नम्बर ०१२५२३१२०९२ मा सम्पर्क गरिदिन आग्रह गरेको छ ।
