एकीकृत नेकपा(माओवादी)का अध्यक्ष पुष्पकमल दाहालको प्रस्तावकमा र राष्ट्रिय प्रजातन्त्र पार्टी नेपालका अध्यक्ष कमल थापासहित केही साना दलको सर्मथनमा नेकपा(एमाले)का अध्यक्ष केपी शर्मा ओलीले प्रधानमन्त्रीको उम्मेदवारी दर्ता गराउदै । तस्बिर ः प्रदीपराज वन्त, रासस

काठमाडौँ, २३ असोज । प्रधानमन्त्रीको उम्मेदवारी दर्ता गराएका नेकपा(एमाले)का अध्यक्ष केपी शर्मा ओलीलाई एकीकृत नेकपा(माओवादी) र राप्रपा नेपालसहित साना दलले सघाउने भएका छन् ।

एकीकृत नेकपा(माओवादी)का अध्यक्ष पुष्पकमल दाहाल ओलीको प्रस्तावक छन् । राष्ट्रिय प्रजातन्त्र पार्टी नेपालका अध्यक्ष कमल थापासहित केही साना दलको सर्मथनमा एमाले अध्यक्ष ओलीले उम्मेदवारी दर्ता गराएका हुन् । ओलीले प्रधानमन्त्री पदको उम्मेदवारी दर्ता गराउँदा एमालेका वरिष्ठ नेता झलनाथ खनाल, उपाध्यक्ष वामदेव गौतम, विद्यादेवी भण्डारी, एमाओवादी अध्यक्ष दाहाल, नेकपा(माले)का महासचिव सिपी मैनाली, राष्ट्रिय जनमोर्चाका अध्यक्ष चित्रबहादुर केसी उपस्थित थिए । यस्तै, एमालेका सांसदको पनि उल्लेख्य सहभागिता थियो ।

अध्यक्ष ओलीलाई प्रधानमन्त्रीमा सहयोग गर्ने अन्य राजनीतिक दलमा राष्ट्रिय प्रजातन्त्र पार्टी, नेकपा(माले), राष्ट्रिय जनमोर्चा, बहुजन शक्ति पार्टी, नेपाः राष्ट्रिय पार्टी, राष्ट्रिय जनमुक्ति पार्टी लोकतान्त्रिक र नेपाली जनता दल छन् ।

संसद्मा एमालेको १८३, एमाओवादीको ८३, राप्रपा नेपालको २५ सांसद रहेका छन् । यस्तै, राष्ट्रिय प्रजातन्त्र पार्टीको १२, नेकपा(माले) को ५, राष्ट्रिय जनमोर्चाको ३, राष्ट्रिय जनमुक्ति पार्टी लोकतान्त्रिकको २, बहुजन शक्ति पार्टीको १, नेपाली जनता दलको १ सांसद छन् । यसरी हेर्दा अध्यक्ष ओलीको पक्षमा ३१५ सांसद् रहेको देखिन्छ ।

व्यवस्थापिका–संसद् सचिवालयले शुक्रबार नयाँ प्रधानमन्त्री निर्वाचनसम्बन्धी कार्यतालिका प्रकाशन गरेको थियो । संसद्को शुक्रबारको बैठकमा सभामुख सुवास नेम्वाङले प्रधानमन्त्रीको निर्वाचनसम्बन्धी आवश्यक व्यवस्था मिलाउन दिनुभएको निर्देशनअनुसार नै कार्यतालिका प्रकाशन गरिएको हो । आइतबार बिहान ११ बजे बस्ने संसद् बैठकमा प्रधानमन्त्रीको उम्मेदवारका समर्थक र प्रस्तावकले आ–आफ्नो धारणा राखेपछि मतदान प्रक्रियामा सुरु हुनेछ ।

राष्ट्रपति डा रामवरण यादवले सहमतिको आधारमा प्रधानमन्त्री चयन गर्न दिएको समयसीमा बिहीबार सकिएपछि आजदेखि बहुमतीय प्रक्रियाका आधारमा प्रधानमन्त्री चयनको प्रक्रिया अगाडि बढेको हो ।