मंगलबार, असोज १३ २०७७ | Tue, September 29, 2020
नेपालको समय: १९:२९ | UK Time: 14:44

सहमति भांड्न खोज्नेलाई कानुनी कठघरामा उभ्याउने कंडेलको चेतावनी

वीनेपाली
२०७१ भदौ २६ गते २३:१८
सहअध्यक्ष कंडेल

सहअध्यक्ष कंडेल

लन्डन । गैर आवासीय नेपाली संघ बेलायतका सहअध्यक्ष महेन्द्र कंडेलले गत वर्ष २९ सेप्टेम्बर २०१३ का दिन लन्डनस्थित नेपाली दूतावासमा भएको सहमति भांड्ने र तोड्ने प्रयास गरिए सम्वन्धित व्यक्तिहरुलाई बेलायती कानुनअनुसार अदालतको ढोकासम्म पुर्याउने चेतावनी दिएका छन् । १० सेप्टेम्बर बुधवार सञ्चारमाध्यम मार्फत विज्ञप्ति जारी गर्दै कंडेलले त्यस्तो चेतावनी दिएका हुन् ।
विज्ञप्तिमा कंडेलले सहज वातावरण निर्माणका लागि वर्तमान अध्यक्ष योगेन क्षेत्रीलाई गत वर्षको सहमति कार्यान्वयन गर्दै नेतृत्व हस्तान्तरण गर्न आव्हान समेत गरेका छन् । क्षेत्रीलाई नैतिकताको आधारमा २९ सेप्टेम्बरका दिन नेतृत्व हस्तान्तरणको कार्यक्रम राख्न कंडेलको सार्वजनिक माग छ ।

एनआरएनए आइसीसी सम्मेलनमा समेत ताली बजाएर एनआरएनए यूकेको सहमतिलाई स्वागत गरिएको स्मरण कंडेलले गराएका छन् । उनले सहमतिकै आधारमा अहिलेको कार्यसमितिले बेलायतमा काम गरिरहेकाले आगामी २९ सेप्टेम्बरमा सहजरुपमा नेतृत्व हस्तान्तरण गर्न आग्रह गरे । विज्ञप्तिमा कंडेलले सहमति कार्यान्वयन गर्नुको सट्टा एनआरएनए कार्यसमिति, आइसीसी सदस्यहरु र संरक्षकविरुद्ध अभिव्यक्ति दिंदै हिंडेको भन्दै आपत्ति समेत जनाइएको छ ।
असाधारण एकता सम्मेलनको सहमति कार्यान्वयनबाट अध्यक्ष क्षेत्री पछि हटे आफूले सहमतिको अक्षरशः पालना गर्ने जनाउ पनि कंडेलले विज्ञप्तिमा दिएका छन् । कंडेलले अध्यक्ष क्षेत्री भित्रभित्रै कार्यसमिति विघटन गरि २, ४ जनाको हातमा शक्ति सुम्पने षड्यन्त्रमा लागेको आरोप पनि लगाएका छन् । उनले यसरी गलत प्रक्रिया अपनाई सहमति भांड्ने कार्यमा कोही व्यक्ति लागेमा अदालतसम्म पुर्याउन पछि नपर्ने चेतावनी समेत दिएका छन् ।

गत वर्ष २९ सेप्टेम्बरमा लन्डनस्थित नेपाली दूतावासमा तत्कालिन एनआरएनए आइसीसी अध्यक्ष जीवा लामिछाने र संस्थापक अध्यक्ष उपेन्द्र महतोको विशेष अनुरोधमा प्राध्यापक डाक्टर सूर्य सुवेदीको पहलमा एकता सम्मेलन सम्पन्न भएको थियो । केन्द्रीय उपाध्यक्ष क्याप्टन हितमान गुरुङ समेत सहभागी उक्त सम्मेलनमा चक्रीय प्रणाली अनुसार नेतृत्व गर्ने सहमति भएपनि क्षेत्रीले अहिले त्यो सहमति नमान्ने दलिल गर्दै आएका छन् । विज्ञप्तिबारे सम्पर्क गर्न खोज्दा क्षेत्री उपलव्ध हुन चाहेनन् ।

प्रतिक्रिया

सम्बन्धित सामाग्री

फेसबुक