लण्डनका प्राथमिक विद्यालयहरु यस सत्रका लागि बन्द

लण्डन । कोरोना भाइरसको संक्रमण बढ्दै गएपछि लण्डनका सबै प्राथमिक विद्यालयहरु यो सत्रका लागि बन्द हुने भएका छन् ।

लण्डनका मेयर सादिक खानले शुक्रबार बेलुकी सरकारसँगको छलफल पछि सो निर्णय गरिएको जानकारी दिएका हुन् ।

कोरोना संक्रमण फैलिएका ५० विद्यालयहरुबाहेक अन्यमा पूर्वघोषित मितिमै प्राथमिक विद्यालयहरु खोल्ने सरकारको निर्णयलाई लण्डनका स्थानीय निकायहरुले विरोध गरेका थिए र सोका विरुद्ध कानुनी लडाइँ लड्ने चेतावनीसमेत दिएका थिए ।

लण्डनका नौ वटा काउन्सिलहरुले सरकारको सो निर्णयको विरोध गरेको द गार्डियनले जनाएको छ । उनीहरुले निर्णय सच्याउन सरकारलाई पत्राचार गरेका थिए ।

स्थानीय निकायहरुको असहमतिपछि नयाँ वर्षकै दिन आकस्मिकरुपमा बसेको मन्त्रिपरिषद्को बैठकले पूर्ववर्ती निर्णय परिवर्तन गरेको हो ।

सरकारको नयाँ निर्णयको स्थानीय काउन्सिलहरुले स्वागत गरेका छन् ।

यस घटनाले सरकारको निर्णय क्षमताप्रति नै प्रश्न उठाएको छ ।

सरकारको नयाँ निर्णयअनुसार अब सोमबारदेखि सबै प्राथमिक विद्यालयहरुले अनलाइन कक्षा चलाउनु पर्नेछ तर अत्यावश्यक सेवामा कार्यरत मानिसहरुको छोराछोरीका लागि भने प्राथमिक विद्यालय खुला रहनेछन् ।