आफैंले चलाएको गाडी भीरमा खस्दा उपमेयर मीनराज राना मगरको ज्यान गयो

लुम्बिनी । प्यूठानको स्वर्गद्वारी नगरपालिकाका उपप्रमुख मीनराज राना मगरको सवारी दुर्घटनामा मृत्यु भएको छ ।

उपप्रमुख राना मगरले आज नगरपालिकाको लु.प्र.०१–००१ झ ०००८ नम्बरको नगरपालिकाको बोलेरो पिकअप गाडी आफैँ चलाएर स्वर्गद्वारीबाट धनवाङतर्फ जाँदै गरेको अवस्थामा दुर्घटना हुँदा मृत्यु भएको जिल्ला प्रहरी कार्यालय प्यूठानका प्रहरी नायब उपरीक्षक (डिएसपी) नरहरि अधिकारीले जानकारी दिनुभयो ।

स्वर्गद्वारी नगरपालिका–२ बाङ्गेसाल सडक खण्डमा स्वर्गद्वारीबाट धनवाङतर्फ जाँदै गर्दा नगरपालिकाको बोलेरो पिकअप जिप खाल भन्ने स्थानमा दुर्घटना भएको हो । दुर्घटनाग्रस्त गाडी सडकदेखि झण्डै ४०० मिटर तल खसेकाले थियो । उक्त गाडीलाई क्रेनको सहायताले तानेर उद्धार गरिएको र उपप्रमुख राना मगरलाई उद्धार गरी उपचारका लागि भिङ्ग्री अस्पतालमा लगिएकामा स्वास्थकर्मीले मृत घोषणा गरेको प्रहरी नायब उपरीक्षक अधिकारीले जानकारी दिनुभयो ।