लण्डन । बेलायतमा अर्को नयाँ खालको कोरोना भाइरस फेला परेको छ ।
यो भाइरस यसअघि बेलायतमा फेला परेको भन्दा फरक खालको भएको बेलायतका स्वास्थ्य मन्त्री म्याट ह्यानककले बुधबार बेलायती प्रधानमन्त्रीको कार्यालयमा आयोजित पत्रकार सम्मेलनमा बताए ।
उनले सो किसिमको भाइरस दक्षिण अफ्रिकाबाट बेलायत आएका मानिसहरुमा फेला परेको जानकारी दिए । यसबारेमा दक्षिण अफ्रिकालाई जानकारी दिइसकिएकाे पनि उनले बताए । सो भाइरस बेलायतमा फेला परेको भाइरसभन्दा झनै छिटो फैलन सक्ने किसिमको भएको पनि उनले प्रष्ट पारे ।
बेलायतले दक्षिण अफ्रिकाबाट युके आउन रोक लगाएकाे उनले बताए । उनले दक्षिण अफ्रिकाबाट गत दुई सातामा बेलायत आएका र यसरी आएका मानिसहरुको सम्पर्कमा आएका सबैलाई क्वारेन्टीमा बस्न पनि अनुरोध गरेका छन् ।
टियर ४ मा अरु क्षेत्र थपिए
सरकारले सर्रे, ह्याम्पसायर (न्यू फोरेस्टबाहेक), ससेक्स, अक्सफोर्डसायर, नर्फोक, सफोक, क्याम्ब्रिजसायर र एसेक्सका यसअघि टियर ४ मा नराखिएका क्षेत्रहरु बक्सिङ डेकै रातिदेखि टियर ४ मा राखेको छ ।
यसअघि लण्डन, दक्षिण पूर्वी र पूर्वी इङल्याण्डका क्षेत्रहरुलाई टियर ४ मा राखिएको थियो ।
यस्तै बक्सिङ डेकै दिनदेखि ब्रिस्टोल, ग्लुस्टरसायर, सोमरसेट, स्वीण्डन, आयल अफ वाइट, द न्यू फोरेष्ट, नर्थह्याम्पटनसायर, चेसायर र वारिङटनलाई टियर ३ मा राखिएको छ भने कोर्नवाल र हेरेफोर्डसायरलाई टियर २ मा राखिएको छ ।
