लन्डन । नेपाली क्रिकेट टिमले पहिलोपटक विश्वकै प्रतिष्ठित लन्डनस्थित लर्डस् (होम अफ क्रिकेट) मैदानमा म्याच खेल्ने भएको छ । आगामी १९ जुलाई, २०१६ का दिन विश्वकै लोकप्रिय मार्लेवोन क्रिकेट क्लव (एमसीसी) संग नेपाली खेलाडीले पहिलोपटक खेल्ने भएका हुन् ।
इंग्ल्याण्ड र पाकिस्तानबीच टेस्ट म्याच भएको भोलिपल्ट उही पिचमा नेपाली टिम र एमसीसीबीच खेल हुने भएको हो ।
नेपाल र एमसीसीबीचको म्याच बेलायत नेपाल कुटनीतिक सम्वन्ध स्थापनाको दुई सय वर्ष गांठको एउटा हिस्सा भनिएको छ । क्रिकेट एसोसिएसन अफ नेपालको पहल र लन्डनस्थित नेपाली दूतावास तथा बेलायती विदेश मन्त्रालयको सहयोगमा म्याच सम्भव भएको हो । लन्डनस्थित नेपाली दूतावासले खेलमा उच्च सहभागिताका लागि बेलायतस्थित नेपाली संघसंस्थाका पदाधिकारीसंग छलफल गरिसकेको छ । खेल हेर्न नेपाल र बेलायत दुवै देशका विशिष्ठ पदाधिकारी सहभागी हुने अपेक्षा गरिएको नेपाल क्रिकेट र एमसीसीबीच पुलको काम गरिरहेका क्रिकेटप्रेमी प्रशान्त कुंवरले जनाए । उनले नेपालमा क्रिकेट खेलको विकास आशातित रुपमा भइरहेको जनाउंदै आसन्न खेलले एमसीसी क्लवसंग नेपाली टिमको सम्वन्ध अझ मजवुत हुने विश्वास व्यक्त गरे ।
गत नोभेम्बर २०१५ मा नेपाल गएको एमसीसीले क्रिकेट एसोसिएसन नेपालसंग सम्वन्ध मजवुत बनाइरहेको छ । नेपाल टिमका क्याप्टेन पारस खड्काले एमसीसीका लागि सन् २०१५ मा दुवइमा इमिरेट्स टि २० खेलेका थिए । पारस खड्काले यसपटकको म्याच पनि खेल्ने विश्वास गरिएको छ । एमसीसी हेड अफ क्रिकेट जोन स्टेपहेन्सन भन्छन्, ‘नेपाली टिम जुलाईमा लर्डस्मा खेल्न आउन लागेकामा हामी प्रसन्न छौं । हामी खेलाडी र समर्थकहरुलाई लर्डस् मैदानमा स्वागत गर्न प्रतिक्षारत छौं ।’
स्टेपहेन्सनले गत वर्ष नेपाल जांदा आफूले क्षमतावान नेपाली खेलाडी देखेको जनाउंदै बलियो एमसीसी टिम बनाएर दर्शकहरुलाई भरपुर मनोरन्जन दिने बताए ।
खेलको टिकट विक्रीबाट संकलित रकम गोर्खा वेलफेयर ट्रष्टमार्फत नेपालको पुनर्निर्माणमा खर्च गरिने जनाइएको छ । उता, एमसीसीले पनि नेपालको क्रिकेट पूर्वाधार निर्माणमा सघाउने कुंवरले जनाए । क्रिकेट एसोसिएसन अफ नेपालकी सिइओ भावना घिमिरेले लर्डस मा सहभागी हुन पाउनु नेपालका लागि ठूलो अवसर भएको जनाउंदै यसले खेलाडीको मनोवल समेत बढाउने बताएकी छिन् ।
ब्रिटिशहरुले औधि रुचाएका गोर्खा समेत इभेन्टको एक हिस्सा हुनेछन् र उनीहरुले पाइप र ड्रम्स बजाउने कार्यक्रम छ ।
